«Нас абкружылі з усіх бакоў». У Гродне міліцыя шукала пратэстоўцаў на дзіцячым навагоднім свяце
У нядзелю 27 снежня ў гродзенскім мікрараёне Баранавічы дзеці і дарослыя сабраліся на навагодні ранішнік. Свята арганізавала мясцовая царкоўная парафія. У разгар ранішніка прыехала некалькі машын міліцыі, аднаго з удзельнікаў паспрабавалі затрымаць, дзеці перапалохаліся. На наступны дзень мужчыну ўсё ж затрымалі, піша Hrodna.life.
Ранішнік арганізаваў мясцовы прыход храма ў гонар Аўгустоўскай іконы Божай Маці. «Гэта было парафіяльнае свята для дзяцей — каб яны не сядзелі за кампутарамі, каб і да іх прыйшло свята Новага года», — распавёў настаяцель храма Цімафей Ноздрын.
Пра мерапрыемства святар казаў на службах. Многія парафіяне адгукнуліся і дапамаглі з арганізацыяй. Замест елкі ўпрыгожылі сасну ля храма.
Пераважна на свяце сабраліся жыхары Баранавіч, прыехалі і іх сябры, сваякі. Агулам было некалькі дзясяткаў чалавек.
«Які зараз закон, якія праваахоўнікі…»
Забавы з дзецьмі пачаліся а 15 гадзіне, а каля 17 гадзіны, калі дзеці чыталі вершы і вадзілі карагод, прыехала міліцыя. «Нас абкружылі з усіх бакоў. Царква знаходзіцца ў скверы, вакол сквера — дарога. І з кожнага боку стаяла машына. Я бачыў тры «ўазікі», і былі яшчэ ў цывільным на сваіх аўтамабілях», — расказаў настаяцель. Усяго прыехала шэсць машын.
«Я стаяў на ганку храма. Бачу: прыехаў патрульны аўтамабіль міліцыі. Падумаў, што шмат людзей назбіралася, і гэта прыцягнула іх увагу». Настаяцель пабачыў, што людзі пачалі разыходзіцца ў розныя бакі: нехта ў царкву, нехта ў будынак нядзельнай школы. Калі айцец Цімафей падышоў, высветлілася, што міліцыя хацела забраць з сабой мужчыну, які быў з дзіцём і з сабакам, вадзіў карагод з усімі.
Міліцыянты сказалі святару, нібы недзе непадалёку праходзіў незаконны мітынг, і людзі прыбеглі з таго мітынгу сюды. «Я патлумачыў, што не бачыў нікога са сцягамі, у нас ніхто лозунгаў не крычаў, а праходзіць свята для дзяцей. Яны не хацелі яго [мужчыну] адпускаць, але агульнымі сіламі - пераважна былі жанчыны з дзецьмі - мы яго «адбілі»». У панядзелак стала вядома, што мужчыну ўсё ж затрымалі: забралі з працы. Таксама адзін з парафіян расказаў айцу Цімафею, што чалавека, на якога зарэгістраваны ягоны аўтамабіль, выклікалі ў РАУС тлумачыць, што аўто рабіла каля царквы ў час свята.
Ранішнік перапыніўся, усе раз’ехаліся. «Безумоўна, свята не было скончана, не ўсім раздалі падарункі, не ўсе дзеці паспелі расказаць свае вершы».
«Прыйшлі з дзеткамі, дзіця вершык расказвала Дзеду Марозу, у вачах радасць. І тут я бачу — праехаў уазік, ну праехаў ды і праехаў. А праз хвіліну ляціць прама па полі да елкі нашай, выходзяць, я так сабе падумала: які зараз закон, якія праваахоўнікі… трэба ўцякаць, бо, чула, у Менску таксама прыйшлі пад елку, з дзецьмі забіралі. Дзіця, не раз бачыўшы, што робяць супрацоўнікі міліцыі, вельмі напалохалася», — расказала Hrodna.life адна з удзельніц свята.
Цяпер чытаюць
Завадчанін Ігар, які вяртаўся дадому бухім, упершыню ў жыцці едзе за мяжу. А яшчэ ён халасты6
Каментары