У сацсетках пішуць, што ў Слуцку ўпаў расійскі «Шахед». Улады маўчаць
У Слуцку ўпалі расійскія «Шахеды», магчыма, дронаў было два, дарогу перакрылі — такія паведамленні з'явіліся ў сацсетках, але ўлады інфармацыю не каментуюць, у тым ліку і не абвяргаюць паведамленні.
Паводле інфармацыі тэлеграм-канала «Беларусь за МКАДом», інцыдэнт адбыўся ўдзень у раёне вёскі Навадворцы, гэта літаральна за пару кіламетраў ад Слуцка, непадалёк ад вуліцы Максіма Багдановіча.
Пры гэтым з'явілася інфармацыя, што збіць маглі адразу два дроны — другі нібыта ўпаў каля вёскі Лучнікі ў прамежку з 11:00 да 13:00. Пра гэта піша канал «Рэальная Беларусь».
Журналістка «Белсата» патэлефанавала як занепакоеная жыхарка горада ў найбліжэйшыя да месца здарэння ўстановы. Там паведамілі, што частку вуліцы Максіма Багдановіча сапраўды перакрылі, дагэтуль на некаторых участках дарогі з боку вёскі не адноўлены рух, працягваюць працаваць экстранныя службы.
Але за пару кіламетраў ад вёскі і перакрытага ўчастку не чулі выбуху і мяркуюць, што дрон не выбухнуў.
«Ад вуліцы Леніна ездзяць машыны, ідуць аўтобусы. На Багдановіча перакрытая дарога недзе ў Навадворцах — кажуць, там яшчэ не адкрылі рух. Паведамляюць, што дрон лятаў там у раёне запраўкі, але нічога не вядома. Там людзей няма, калі б у запраўку трапіў — выбухнула б, а так, напэўна, усё нармальна», — распавёў суразмоўца.
У гарадскіх пабліках былі допісы пра тое, што нешта ў Слуцку адбываецца, але адміністратары выдаляюць паведамленні і просяць чакаць афіцыйных заяў.
Афіцыйныя структуры і экстранныя службы захоўваюць маўчанне.
Цяпер чытаюць
«Соевыя экстрэмісты павінны адпрацаваць міску клубніц». Скардзіўся на ўмовы працы ў КДБ, а цяпер уцюхвае трэнінгі сілавікам — хто такі Антон Шабуневіч1919
Каментары