20 студзеня суд Кастрычніцкага раёна Віцебска пачаў разглядаць крымінальную справу Юліі Кашаверавай. 22-гадовую дзяўчыну вінавацяць у тым, што на вулічным маршы яна пашкодзіла міліцэйскую машыну.
Здарылася ўсё 4 кастрычніка.
«Паводле даных следства, Юлія ішла ў пешай калоне па горадзе разам з іншымі ўдзельнікамі «несанкцыянаванага мерапрыемства», якія выступалі супраць вынікаў прэзідэнцкіх выбараў, — паведамляў партал tut.by у рэпартажы з суда. —
Каля дома № 74 на Маскоўскім праспекце да пратэстоўцаў пад'ехала міліцыя. Аднаго з мужчын затрымлівалі. Удзельнікаў шэсця гэта абурыла, яны спрабавалі адбіць аднадумца. У адказ сілавікі ўжылі газ з балончыка.
Падчас сутычкі з міліцыяй Кашаверава, як сцвярджае следства, пашкодзіла мікрааўтобус Ford Transit, які належыць УУС аблвыканкама: «Ударыла па ім нагой не менш за тры разы, нанёсшы ўвагнутасць, а таксама кінула ўслед аўтамабілю драўляную палку».
У той жа дзень Юлію затрымалі, 7 кастрычніка быў суд па 23.34 — але пратакол адправілі на дапрацоўку. Дзяўчыну выпусцілі.
Але, як высветлілася, ненадоўга.
«20 кастрычніка да нас прыйшлі, — расказаў «Нашай Ніве» Сяргей Іванавіч, бацька дзяўчыны. — Дома быў ператрус, Юлю забралі сілавікі. 22 кастрычніка — другі раз ператрус. Забралі камп’ютар, тэлефоны, флэшкі, Юліну вопратку. І з 20 кастрычніка Юля знаходзіцца ў віцебскім СІЗА №2».
Цяпер Юлію Кашавераву абвінавачваюць у злосным хуліганстве: гэта ад 1 да 6 гадоў зняволення.
На судзе дзяржабвінаваўца паведаміў, што міліцыі нанесеная шкода на суму 841 рубель. Раней, дарэчы, сілавікі паведамлялі аб 405 рублях шкоды, частка яе абвінавачаная ўжо кампенсавала.
Акрамя таго, паводле даных следства, Юлія сарвала медыцынскую маску і форменную шапку з камандзіра звяна АМАПа Аляксея Альхімовіча.
Пакуль што ў пасяджэнні перапынак аж да 4 лютага. Юлія паказанняў яшчэ не давала.
«Летась яна толькі скончыла віцебскі медыцынскі каледж. У канцы ліпеня ўладкавалася на працу медсястрой 103 мабільнай брыгады», — кажа бацька Юліі.
7 кастрычніка быў той суд па 23.34, яе адпусцілі, на наступны дзень яна выйшла на працу — там адразу прапанавалі звольніцца. Юля пагадзілася, 9 кастрычніка яе аператыўна звольнілі.
Цяпер на судзе я прысутнічаў. Юля змянілася, вядома: бледная, кашляе», — кажа тата.
«Напэўна, у любым выпадку дачку прызнаюць вінаватай», — прагназуе тата Юліі.
Лісты да Юліі даходзілі, ішлі 8—10 дзён. Яна просіць перадаць падзяку людзям, якія дасылалі ёй словы падтрымкі.
Цяпер чытаюць
Былы міністр культуры Руслан Чарнецкі знайшоў сабе падпрацоўку9
Каментары