Кавід распаўсюдзіўся ў Паўднёвай Амерыцы ўвесну летась. Ужо ў канцы мая Чылі разам з Перу апынуліся сярод лідараў па захворваннях: колькасць выпадкаў кавіду ў Чылі набліжалася да 80 тысяч, а памерлых было больш за 800.
Аднак цяпер Чылі ўражвае тэмпамі вакцынацыі: у гэтай дзяржаве з 19 мільёнамі насельніцтва зроблена больш за два мільёны прышчэпак ад кавіду, і хуткасць імунізацыі з цягам часу павялічваецца. Як гэтая горная краіна здолела дамагчыся такога поспеху?
Па-першае, з самага пачатку чылійскі ўрад прыняў рашэнне прыкласці ўсе намаганні, каб атрымаць хоць нейкую вакцыну.
Кіраўніцтва краіны заключыла пагадненні адразу з некалькімі вытворцамі — кампаніямі Pfizer, Sinovac, Covax (WHO), Johnson & Johnson і Astrazeneca. Дзякуючы гэтаму чылійцы павінны атрымаць 35,7 мільёнаў доз вакцын, паведамляе CNN.
Па-другое, мясцовае кіраўніцтва шмат працавала над тым, каб ператварыць любую грамадскую прастору ў цэнтр вакцынацыі.
Напрыклад, такі цэнтр зараз размяшчаецца ва ўнутраным двары Папскага каталіцкага ўніверсітэта ў сталіцы Чылі — Санцьяга. Чыноўнікі вырашылі размясціць цэнтры для вакцынацыі не толькі ў школах і адміністрацыйных установах, але і ў месцах накшталт гандлёвых цэнтраў і футбольных стадыёнаў.
Таксама дапамагло тое, што кожны прадстаўнік чылійскага ўрада падтрымліваў на публіцы ідэю неабходнасці захоўваць сацыяльную дыстанцыю і насіць маску.
І пакуль іншыя краіны разважалі над тым, у якой чарговасці людзі павінны атрымаць вакцыну, чылійскія ўлады хутка выпрацавалі парадак вакцынацыі, які цалкам выконваецца. Так, пасля медыкаў прышчэпку пачалі атрымліваць пажылыя людзі, настаўнікі, фармацэўты і паліцэйскія.
Плануецца, што яшчэ да завяршэння першай паловы 2021 года 80% чылійцаў будуць вакцынаваныя.
Каментары