Беларусь не адмовілася ад ідэі стварэння ўласнага марскога гандлёвага флоту, заявіў сёння на прэс‑канферэнцыі першы намеснік міністра транспарту і камунікацый Мікалай Верхавец.
Першы намеснік міністра адзначыў, што ў Беларусі штогод каля 20 млн.т грузаў падлягае марской перавалцы і транспарціроўцы. «Мы аддаём іх кампаніям, якія маюць флот, у той жа час выгадней было б выкарыстоўваць уласны марскі флот», — сказаў ён.
Беларусь разглядае некалькі варыянтаў фарміравання марскога флоту — з удзелам расійскіх і літоўскіх партнёраў.
Так, з расійскай кампаніяй «Сучасны камерцыйны флот» праведзены перагаворы аб магчымасцях супрацоўніцтва, аднак беларускі бок пакуль не задавальняюць тыя ўмовы, якія прапануюць расійскія калегі. «Напрыклад, кампанія патрабуе, каб беларускія ўладальнікі грузаў карысталіся толькі паслугамі іх кампаніі. Але мы не можам пайсці на такія крокі, таму што будзем прывязаны толькі да аднаго перавозчыка, які будзе дыктаваць свае правілы работы», — адзначыў першы намеснік міністра.
Магчымасці фарміравання беларускага гандлёвага флоту абмяркоўваюцца і з літоўскім бокам, у прыватнасці з кіраўніцтвам клайпедскага порта. «Літоўскія калегі зацікаўлены, каб мы па добрых цэнах перадавалі ім для транспарціроўкі свае грузы. Мы ж хочам, каб гэта прадпрыемства з’яўлялася суб’ектам гаспадарання Беларусі і працавала ў нашай краіне», — казаў Мікалай Верхавец.
Разглядаецца таксама магчымасць удзелу ў праекце кампаній далёкага замежжа. Некаторыя замежныя інвестары гатовы працаваць у Беларусі, прадастаўляючы свае марскія судны і паслугі беларускім грузаўладальнікам.
У сваю чаргу начальнік упраўлення марскога і рачнога транспарту Мінтранса Браніслаў Гавароўскі адзначыў, што патрэбнасць у марскіх суднах ва ўсім свеце рэзка знізілася ва ўмовах крызісу. Судны стаяць без работы ў чаканні грузаў. «У той жа час з’явілася магчымасць набыць марское судна танней, мы аналізуем гэту сітуацыю. Вядзецца работа па прыцягненні ў Беларусь інвестараў з суднамі, якія маглі б працаваць у рэспубліцы і перавозіць беларускія грузы», — расказаў спецыяліст.
Цяпер чытаюць
У міліцэйскім конкурсе прыгажосці перамагла амапаўка, якая ў 2020 годе разганяла пратэсты39
Каментары