Белтэлерадыёкампанія пракаментавала інфармацыю пра спыненне трансляцый імшы на радыё
Белтэлерадыёкампанія выступіла з афіцыйнай заявай, у якой назвала інфармацыю пра спыненне трансляцый святой імшы на Беларускім радыё «сфабрыкаванай правакацыяй». Пры гэтым і вернікі, якія слухалі фізічны эфір, і расклад на сайце радыё тры тыдні запар фіксавалі адсутнасць набажэнстваў і замену іх на класічную музыку, піша Katolik.life.
Паводле партала Katolik.life, Першы нацыянальны канал Беларускага радыё тры тыдні запар не трансляваў а 8:15 нядзельную імшу з мінскага архікатэдральнага касцёла. Замест службы ў фізічным эфіры гучала класічная музыка.
Пры гэтым, на сайце радыё ў хвілінным раскладзе мінулых эфіраў замест праграмы «Каталіцкая пропаведзь» значылася «Тэматычная рубрыка».
У самім жа архікатэдральным касцёле пра спыненне эфіраў не чулі — святары працягвалі адпраўляць службу па секундамеры, каб укласціся ў радыётаймінг.
Дзяржаўнае радыё ў адказ абвінаваціла рэсурсы, якія напісалі пра праблему, у «распаўсюдзе заведама лжывай інфармацыі».
Паводле версіі БТ, трансляцыя нікуды не знікала, а крытыкі проста не слухалі радыё ў Беларусі і зрабілі памылковыя высновы паводле сайта.
«Відавочна, што аўтары ўкіду не маюць рэальнай магчымасці слухаць радыёэфір на тэрыторыі Рэспублікі Беларусь, у сувязі з чым спасылаюцца ўсяго толькі на метаданыя з сайта Першага нацыянальнага канала Беларускага радыё, дзе трансляцыя згадваецца як «тэматычная рубрыка», што з’яўляецца тэхнічным пазначэннем прамога эфіру», — піша прэс-служба Белрадыёккампаніі.
Прадстаўнікі радыё настойваюць, што праграма «Каталіцкая пропаведзь» выходзіла і выходзіць а 8:15 без змен.
Яны назвалі інфармацыю пра спыненне трансляцый «наўмысна сфабрыкаванай правакацыяй, накіраванай на раскол грамадства праз ілжывыя абвінавачванні».
Цяпер чытаюць
Стала вядомая асоба рабочага «Беларуськалія», які загінуў пры абрушэнні горнай пароды1
Каментары