Міністэрства гандлю Беларусі пакінула ў сіле забарону на продаж піва аб’ектамі дробнарознічнай гандлёвай сеткі
Міністэрства гандлю Беларусі пакінула ў сіле забарону на продаж піва аб’ектамі дробнарознічнай гандлёвай сеткі. Такі адказ быў атрыманы РГА «Перспектыва».
Як паведамлялася раней, гэтае грамадскае аб’яднанне прадпрымальнікаў прапанавала Савету міністраў дазволіць у кіёсках і павільёнах продаж піва айчынных вытворцаў.
У зваротным лісце Мінгандлю гаворыцца: «Забарона скіравана перадусім на прадухіленне п’янства і алкагалізму сярод непаўналетніх як найбольш верагодных пакупнікоў гэтай прадукцыі ў аб’ектах дробнарознічнай гандлёвай сеткі».
Паводле інфармацыі Мінгандлю, «менавіта прадаўцамі кіёскаў ігнаруюцца правілы гандлю ў частцы забароны продажу непаўналетнім ва ўзросце да 18 гадоў слабаалкагольных напояў і піва».
У лісце адзначаецца, што, паводле інфармацыі канцэрна «Белдзяржхарчпрам», абмежавальныя меры рэалізацыі піва прывялі да зніжэння аб’ёмаў продажу гэтай прадукцыі праз дробнарознічную гандлёвую сетку ў кампаній Heineken Belarus (на 25%) і «Крыніца» (на 29%). У сувязі з гэтым канцэрн лічыць мэтазгодным захаваць магчымасць рэалізацыі піва праз дробнарознічную гандлёвую сетку.
Аднак Мінгандалю звяртае ўвагу на тое, што зніжэнне аб’ёмаў продажу піва вытворчасці ААТ «Крыніца» ў першым квартале 2009 года адбылося ў Мінску і Віцебскай вобласці, дзе рашэнні аб абмежаванні рэалізацыі піва не былі прынятыя.
Каментуючы БелаПАН адказ чыноўнікаў, кіраўнік «Перспектывы» Анатоль Шумчанка заявіў: «Мы зрабілі выснову, што за забаронай нехта стаіць, і яго дзеянні па ліквідацыі дробнарознічнай сеткі наўмысныя». Паводле слоў Шумчанкі, у прыватнай размове з ім некаторыя прадстаўнікі мясцовых улад і дэпартамента па прадпрымальніцтве пры Міністэрстве эканомікі заяўлялі, што не разумеюць неабходнасці забароны рэалізацыі піва ў кіёсках і павільёнах.
Нягледзячы на цвёрдую пазіцыю Мінгандлю, у жніўні «Перспектыва» мае намер правесці ў Мінску сустрэчу кіраўнікоў малых гандлёвых прадпрыемстваў, на якую плануецца запрасіць уладальнікаў кіёскаў, павільёнаў, беларускіх півавараў, прадстаўнікоў Грамадска‑кансультатыўнага савета пры Адміністрацыі прэзідэнта, паслоў краін ЕС. «Мы маем намер абмеркаваць праблему з усімі запрошанымі», — падкрэсліў Шумчанка.
Цяпер чытаюць
Лукашэнка загадаў забараніць арганізаваныя паездкі дзяцей за мяжу без дазволу дзяржавы14
Каментары