Давыдзька пра блогераў: Усе павінны знаходзіцца пад жорсткім кантролем, атрымліваць ліцэнзію
Патрэбныя новыя законы для блогераў. Пра гэта ў эфіры YouTube-канала распавёў старшыня аб'яднання «Белая Русь» Генадзь Давыдзька, паведамляе БелТА.
«Цяпер велізарная небяспека зыходзіць ад інтэрнэт-супольнасці, ад так званых блогераў, якія па сутнасці сваёй з'яўляюцца субʼектамі, якія фарміруюць у тым ліку грамадскую думку. Але яны не атрымліваюць ні ліцэнзіі на сваё вяшчанне, незразумела, якая ў іх адукацыя, маральнае аблічча», — звярнуў увагу Генадзь Давыдзька.
Ён параўнаў інтэрнэт з цёмным лесам, куды адпускаюць дзіцё: «А там ваўкі гэтыя, ваўчары. Гэта людзі, якія таксама паднатарэлі ў тэхналогіях, і за лайк яны гатовыя душу прадаць, яны гатовыя маму падпаліць, каб толькі потым мільён лайкаў атрымаць».
Генадзь Давыдзька ўпэўнены, што дзяцей і моладзь ад інтэрнэту не агародзіш, таму неабходна працаваць заканадаўча.
«Пад жорсткім кантролем павінны знаходзіцца ўсе блогеры, якія павінны неяк класіфікавацца, атрымліваць нейкую ліцэнзію, дазвол і адказваць за свае дзеянні», — мяркуе ён.
Старшыня «Белай Русі» канстатаваў, што літаральна тры дзясяткі гадоў таму трэба было быць журналістам ці пісьменнікам, у цэлым заслужаным чалавекам, каб атрымаць доступ да фармавання грамадскай думкі. Трэба было прайсці мастацкія саветы, нават нейкую цэнзуру. «І тады ты мог выходзіць да людзей. Цяпер не. Цяпер я магу тры шасцёркі выбіць у сябе над брывом і забіраць проста мазгі дзяцей», — рэзюмаваў Генадзь Давыдзька.
Цяпер чытаюць
За забойства чалавека ў ІЧУ Барысава арыштавалі двух зэкаў-рэцыдывістаў і 26‑гадовага міліцыянера Кляшчонка1
Каментары