«Наша Ніва» сабрала для вас падборку найлепшых калядных фільмаў усіх часоў на любы густ, якія зробяць святочныя вечары больш утульнымі.
«Гэтае цудоўнае жыццё» (1946), ЗША, драма, фэнтэзі
Амерыканскі казачны фільм ад рэжысёра Фрэнка Капры. Ён унікальным чынам сумясціў прыземленую, часта непрывабную штодзённасць рэальнага жыцця з яе адвечнымі праблемамі і побытавай бязладзіцай з чароўным адчуваннем казкі і непераможным, хай і трохі наіўным, аптымізмам.
Галоўны герой Джордж Бэйлі, жыхар невялікага правінцыйнага мястэчка, настолькі засмучаны незлічонымі праблемамі і доўгам перад мясцовым банкірам, што падумвае аб самагубстве напярэдадні Калядаў. Яму з'яўляецца анёл, які дапамагае ўбачыць, якое, насамрэч, важнае яго жыццё.
«Цуд на 34-ай вуліцы» (1994), ЗША, фэнтэзі, рэжысёр Лэс Мэйфілд
Вы не пралічыцеся, вырашыўшы паглядзець гэтае бессмяротнае каляднае кіно пра мужчыну, які сцвярджае, быццам бы ён сапраўдны Санта-Клаўс.
Маленькія дзеці шчыра вераць у цуды і заўсёды з заміраннем сэрца чакаюць самага чароўнага свята ў годзе. А шасцігадовая Сюзан, у якой няма таты, не верыць, што Санта-Клаўс сапраўдны чараўнік. Але цуд адбываецца пасля сустрэчы з Санта-Клаўсам у буйным нью-ёркскім універмагу «Коўл».
«Шчаўкунок і чатыры каралеўствы» (2018), ЗША, прыгоды, фэнтэзі, рэжысёры— Ласэ Хальстром і Джо Джонстан
Непатрабавальнае «сезоннае» кіно, знятае спецыяльна да сезонных свят. Казачныя мелодыі Чайкоўскага, гіганцкія ёлкі, балі і гурбы снегу з лёгкасцю зараджаюць патрэбным настроем.
Атрымаўшы незвычайны падарунак на Каляды, юная Клара адпраўляецца ў захапляльнае падарожжа па загадкавых мясцінах. Але дзяўчыне трэба патрапіць і ў чацвёртае каралеўства, дзе ёй давядзецца сутыкнуцца з цэлай арміяй мышэй на чале з неверагодна небяспечным Мышыным Каралём.
«Дзяўчаты» (1961), СССР, камедыя, меладрама
Савецкі мастацкі фільм, зняты на кінастудыі «Масфільм» у 1961 годзе Юрыем Чулюкіным.
У сібірскі пасёлак прыехала юная кухарка Тося Кісліцына — наіўная і эксцэнтрычная дзяўчына. Яна суне свой нос ва ўсе справы, кожнаму імкнецца дапамагчы. Мясцовы прыгажун Ілля, паспрачаўшыся на Тосю, заводзіць з ёй раман, які суправаджаецца масай камічных сітуацый…
І ўсё гэта пад Новы год!
«Чарадзеі» (1982), СССР, камедыя, мюзікл
Навагодняя музычна-камедыйная двухсерыйная кінаказка рэжысёра Канстанціна Бромберга.
Навагодняя гісторыя аб тым, што сапраўднае каханне можа тварыць цуды. У інстытуце «НУІНУ» (навуковы ўніверсальны інстытут незвычайных паслуг) кіпіць бурная праца па вырабе чароўнай палачкі. Прэзентацыя прызначаная на 31 снежня, у навагодні вечар. Але тут у справу ўступаюць супернікі дырэктара інстытута, якія пераследуюць свае мэты…
«Паўночны вецер» (2021), Расія, драма
Мастацкі фільм рэжысёркі Рэнаты Літвінавай. Стужка «Паўночны вецер» — пра чараўніцтва і дзівосны свет жанчын, якія жывуць у Паўночным полі і мараць аб сапраўдным каханні. У матрыярхальнага клана Паўночных палёў ёсць традыцыя. Кожны Новы год уся сям'я на чале з Маргарытай збіраецца разам, каб апоўначы дачакацца 13-га ўдару гадзінніка, спаліць паперу з напісаным на ёй жаданнем і выпіць попел разам з шампанскім.
Адно з такіх свят запускае ланцужок падзей, якія прывядуць да непазбежнага заняпаду клана.
«Крампус»(2015), ЗША, жахі, камедыя, драма
Да добрых дзяцей прыходзіць Дзед Мароз, да дрэнных і тых, хто не верыць у Дзеда Мароза — Крампус. Ох, і дастанецца гарэзам ад гэтага злыдня. Амерыканскі фільм жахаў рэжысёра Майкла Догерці — гэта гісторыя пра дэмана, які падчас Калядаў вышуквае непаслухмяных дзяцей, каб пакараць іх.
«Крамка за рогам» (1940), ЗША, драма, камедыя
Класічная калядная рамантычная камедыя Эрнста Любіча. Рэжысёр паказвае ў фільме кіраўніка невялікай будапешцкай крамы падарункаў Альфрэда, які спрачаецца з прадаўшчыцай гэтай жа крамы, сімпатычнай дзяўчынай Кларай.
Абодва яны маладыя, самотныя, і абодва спрабуюць знайсці сваё шчасце па аб'явах у газеце. І ён, і яна завязваюць перапіску з невядомымі партнёрамі. Кожны з іх зачараваны, і кожны спадзяецца на рамантычную сустрэчу ў калядны вечар, які павінен вырашыць іх лёс.
«Залатая моладзь» (1989), ЗША, драма, камедыя
Героі дэбютнага фільма Уіта Сцілмана, багацеі і «каралі жыцця» з Верхняга Іст-Сайда, бяспечна скакалі па Манхэтане 1980-х, пакуль да іх у кампанію не зачасаўся юнак з «няправільнага» боку Цэнтральнага парка.
«Прывітанне сям’і» (2005), ЗША, рамантыка, камедыя
Фільм зняты рэжысёрам Томасам Бэзучам, з галівудскімі зоркамі першай велічыні ў галоўных ролях.
У свае сорак гадоў Эверэт Стоўн яшчэ не жанаты. Але вось аднойчы ён прывозіць на калядную сямейную сустрэчу сваю дзяўчыну Мэрэдыт, з якой збіраецца ажаніцца.
Сям'я Стоунаў адрозніваецца шырокімі поглядамі і славіцца сваім узаемаразуменнем. Але на гэты раз яны наадрэз адмаўляюцца прыняць новага чалавека ў сваё кола. Упэўненыя, што Мерэдыт зусім не пара Эверэту, яны катэгарычна супраць гэтага шлюбу. Пара адчайна імкнецца наладзіць адносіны, але усё робіцца яшчэ горш. Ці атрымаецца ў закаханых застацца разам і пры гэтым захаваць цёплыя адносіны са сваякамі?
Каментары