8 жніўня споўнілася паўгода з моманту затрымання ваўкавыскіх прадпрымальнікаў Мікалая Аўтуховіча, Юрыя Лявонава і Уладзіміра Асіпенкі.
Яны былі затрыманы 8 лютага. 18 лютага прадпрымальнікам было выстаўлена абвінавачанне на падставе арт. 218 Крымінальнага кодэкса (наўмыснае знішчэнне ці пашкоджанне маёмасці). 23 чэрвеня ў дачыненні да Аўтуховіча і, як паведаміла МУС, «іншых асоб» распачата справа на падставе арт. 359 КК (тэрарыстычны акт) у выглядзе падрыхтоўвання (арт. 13). Затрыманыя знаходзяцца ў СІЗА № 1 Мінска.
З 16 красавіка па 16 ліпеня Аўтуховіч праводзіў галадоўку, патрабуючы ў самы кароткі тэрмін альбо перадаць справу ў суд, альбо змяніць усім падследным меру стрымання з утрымання пад вартай на падпіску аб нявыездзе.
Як паведаміў БелаПАН адвакат Аўтуховіча Павел Сапелка, яго падабаронны «вельмі павольна» выходзіць з галадоўкі. «На апошняй сустрэчы ён гаварыў, што яшчэ працягваў губляць вагу. Але зараз стан яго здароўя стабілізаваўся», — сказаў Сапелка.
Адвакат спадзяецца на хуткае завяршэнне папярэдняга расследавання, каб ён і яго падабаронны змаглі пачаць знаёміцца са справай.
«Сёння следства павінна вырашыць пытанне аб прадаўжэнні тэрмінаў утрымання прадпрымальнікаў пад вартай. Я чакаю, што следства будзе прадоўжана яшчэ на месяц», — сказаў Сапелка. Пры гэтым ён адзначыў, што адваката аб прадаўжэнні тэрмінаў утрымання пад вартай не інфармуюць — згодна з законам, знаёмяць з гэтым рашэннем толькі падабароннага.
Цяпер чытаюць
Пальчыс, Андрэева, Лойка і іншыя імёны — пасля візіту амерыканскіх дыпламатаў у Мінск вызвалілі партыю палітвязняў9
Каментары