Беларускі бок на перамовах з віцэ-прэзідэнтам Венесуэлы ўзначаліць Віктар Шэйман.
Сёння ў Мінску пройдзе пасяджэнне беларуска‑венесуэльскай камісіі высокага ўзроўню. Дэлегацыя Венесуэлы на чале з віцэ‑прэзідэнтам, сустаршынёй камісіі Рамонам Карысалесам прыбыла ў Беларусь напярэдадні вечарам.
Паводле інфармацыі беларускага МЗС, у склад дэлегацыі таксама ўвайшлі прадстаўнікі міністэрстваў замежных спраў, навукі, тэхналогій і сярэдняй прамысловасці, энергетыкі і нафты, сельскай гаспадаркі і зямель, навакольнага асяроддзя Венесуэлы.
Беларускі бок на перамовах узначаліць памочнік прэзідэнта па асаблівых даручэннях, сустаршыня камісіі Віктар Шэйман.
У пасяджэнні таксама возьмуць удзел прадстаўнікі ўрада, парламента, Вышэйшага гаспадарчага суда, міністэрстваў замежных спраў, абароны, фінансаў, інфармацыі, лясной гаспадаркі, энергетыкі, гандлю, адукацыі, архітэктуры і будаўніцтва, прамысловасці, сельскай гаспадаркі і харчавання, юстыцыі, аховы здароўя, Дзяржаўнага камітэта па навуцы і тэхналогіях, Дзяржаўнага ваенна‑прамысловага камітэта, канцэрнаў «Белнафтахім» і «Белдзяржхарчапрам», Нацыянальнага банка, Дзяржаўнага камітэта па маёмасці, Мінгарвыканкама і шэрагу іншых арганізацый.
Падчас пасяджэння плануецца абмеркаваць стан і перспектыўныя напрамкі сацыяльна‑эканамічнага развіцця Беларусі і Венесуэлы, шляхі далейшага ўмацавання міждзяржаўнага дыялогу на ўсіх узроўнях, паведаміла прэс‑служба беларускага МЗС.
Будуць таксама разгледжаны ход рэалізацыі праектаў гандлёва‑эканамічнага і навукова‑тэхнічнага супрацоўніцтва дзвюх краін і пытанні развіцця дагаворна‑прававой базы.
Члены венесуэльскай дэлегацыі наведаюць шэраг міністэрстваў, канцэрнаў і дзяржарганізацый Беларусі.
Нагадаем, на прэс‑канферэнцыі 1 ліпеня пасол Венесуэлы ў Беларусі Амерыка Дыяс Нуньес паведаміў пра візіт у Беларусь прэзідэнта Венесуэлы Уга Чавеса. Візіт запланаваны на канец жніўня — пачатак верасня.
Дыпламат таксама паведаміў, што візіт у адказ беларускага прэзідэнта ў Венесуэлу запланаваны на снежань 2009 года.»Цалкам магчыма, што падчас візіту адбудзецца адкрыццё новых сумесных заводаў у Венесуэле», — сказаў пасол.
Дамоўленасць аб сустрэчы ў бліжэйшы час была дасягнутая 20 чэрвеня падчас тэлефоннай размовы Аляксандра Лукашэнкі з Уга Чавесам. Паводле паведамлення прэс‑службы прэзідэнта Беларусі, размова адбылася па ініцыятыве венесуэльскага боку.
Апошні раз Уга Чавес наведаў Беларусь у ліпені 2008 года.
Цяпер чытаюць
Маладую беларуску пратрымалі ў расійскім СІЗА амаль 4 гады і апраўдалі. А кампенсацыю далі такую, нібыта ў твар плюнулі7
Каментары