«Калі б гэта было не так, мы б даўно атрымалі абвяржэнне палітычна матываванай версіі знікненняў».
З юрыдычнага пункту гледжання справы аб гучных знікненнях у Беларусі раскрыты.
Такую заяву зрабіў 17 жніўня на прэс‑канферэнцыі ў Мінску юрыст праваабарончага грамадскага аб’яднання «Беларускі Хельсінкскі камітэт» Гары Паганяйла. «Асобы, якіх падазраюць ва ўчыненні гэтых злачынстваў, устаноўлены. Калі б гэта было не так, мы б даўно атрымалі абвяржэнне палітычна матываванай версіі знікненняў», — сцвярджае юрыст.
Ён адзначыў, што ўсе справы ў дачыненні да палітыкаў Юрыя Захаранкі і Віктара Ганчара, бізнесмена Анатоля Красоўскага і аператара Дзмітрыя Завадскага былі распачаты па факце забойства. «Тэрміны расследавання ў чарговы раз прадоўжаны на два месяцы — да пачатку кастрычніка», — сказаў Паганяйла.
«Здавалася б, знікненне Юрыя Захаранкі — экс‑міністра ўнутраных спраў, чалавека, які валодаў канфідэнцыйнай, сакрэтнай інфармацыяй, — павінна быць расследавана, гэтага патрабуюць інтарэсы дзяржавы. Аднак улада паказала, што яна рэальна не зацікаўлена ў расследаванні гэтай справы», — лічыць прадстаўнік БХК.
«Больш за тое, — дадаў ён, — крымінальная справа па факце знікнення Захаранкі была распачата толькі пасля знікнення Віктара Ганчара і Анатоля Красоўскага (Ганчар і Красоўскі зніклі на некалькі месяцаў пазней.— БелаПАН.). Натуральна, усе першапачатковыя сляды па выкраданні Захаранкі былі страчаны. Але справа нават не ў тым, што дзяржава праявіла нежаданне расследаваць гэтыя справы.
Справа ў тым, што дзяржава гэтым самым прадэманстравала найбольш рабочую і найбольш аптымальную версію — дачыненне вышэйшых службовых асоб да гэтых знікненняў». «Толькі гэтым можна растлумачыць бяздзейнасць як следчых органаў, так і кантралюючых органаў, і ў цэлым службовых асоб па расследаванні злачынстваў», — лічыць Паганяйла.
***
Дзесяць гадоў таму ў Беларусі зніклі без вестак адразу тры чалавекі, двое з якіх былі апазіцыйнымі палітыкамі. Так, 7 мая 1999 года знік былы міністр унутраных спраў генерал Юрый Захаранка, а 16 верасня — былы кіраўнік Цэнтрвыбаркама Віктар Ганчар і яго сябар, бізнесмен Анатоль Красоўскі. Праз год, 7 ліпеня, знік аператар расійскага тэлеканала ОРТ (зараз — Першы канал), былы асабісты аператар Аляксандра Лукашэнкі Дзмітрый Завадскі.
Цяпер чытаюць
Палітолаг Аліна Харысава пагадзілася супрацоўнічаць з СБУ. Аказалася, гэта было КДБ20
Каментары