Bellingcat: Расія выдаткавала мільярды на агентуру ва Украіне, але яе «кінулі»
Расейская ФСБ з 2014 года выдаткавала мільярды даляраў на агентурную сетку ва Украіне, але тыя кінулі яе на грошы. Пра гэта ў інтэрв'ю «Працяг будзе» распавёў кіраўнік аддзела расследаванняў выдання Bellingcat Хрыста Грозеў.
«Цяпер сканчваю адно расследаванне, якое, спадзяюся, на днях апублікую разам з The Insider, пра тое, колькі грошай было выдаткавана ФСБ, каб гарантаваць падтрымку ценявога палітычнага класа ва Украіне гэтай вайны і стварэнне нейкага ўнутранага дзяржаўнага перавароту адразу пасля ўварвання. І вось там гаворка ідзе пра мільярды — даляраў, а не рублёў. Было выдаткавана з 14-га года па сёння. Гэта было 150-160 высокааплатных афіцэраў ФСБ. Кожны з іх меў неабмежаваны бюджэт, каб вербаваць украінцаў любога ўзроўню. Яны вербавалі на паперы, і потым аказалася, што яны ляцелі, каб сустракацца з імі ў Тайландзе, на Мальдывах, Кіпры. Гэтыя грошы яны выдаткавалі на сустрэчы», — распавёў ён.
Па яго словах, агентура не спрацавала.
«Украінскія агенты, якія бралі грошы, яны кінулі. Проста кінулі», — растлумачыў ён.
Ён таксама распавёў, што каманда Bellingcat вяла падлікі страт расійскай арміі і спынілася на лічбе каля 3 тысяч. Гэта было прыкладна тады, калі Мінабароны РФ агучыла лічбы ў 498 загінулых і 1597 параненых, то-бок у пачатку сакавіка. Расследвальнікі падлічвалі колькасць знішчанай тэхнікі і бралі сярэднюю колькасць экіпажа. Яны дасягнулі 3 тысяч і спынілі падлікі, бо палічылі больш важным заняцца колькасцю загінулых сярод мірных жыхароў.
Што тычыцца расейскіх страт, журналіст назваў лічбу 9 тысяч вельмі лагічнай. Ён лічыць, што яна сыходзіцца з тэмпам вайны.
«Я думаю, 8-9 тысяч — гэта рэальная лічба цяпер», — сказаў ён.
Цяпер чытаюць
Пратасевіч зноў жэніцца — цяпер з таролагам Настассяй, якая працавала ў элітным медцэнтры «Мерсі»40
Каментары