Дзяўчыне далі 10 сутак арышту і канфіскавалі тэлефон за лайк пад пастом
Па інфармацыі праваабаронцаў, 1 сакавіка ў Гарадку адбыўся суд над дзяўчынай, якая паставіла лайк пад пастом тэлеканала «Белсат» у Instagram.
Згодна з матэрыяламі справы, міліцыянты забралі ў дзяўчыны тэлефон, але Instagram і Telegram былі з яго выдаленыя. Дзяўчына патлумачыла, што выдаліла іх пасля затрымання, бо баялася, што міліцыянты могуць знайсці там нешта «забароненае».
Тады сілавікі спампавалі іх зноў і ў Instagram-акаўнце дзяўчыны перайшлі ў «захаваныя», дзе былі паказаныя ўсе публікацыі, якія яна «лайкнула». Сярод гэтых публікацый быў пост тэлеканала «Белсат» з Пагоняй, за што мясцовыя міліцыянты склалі на яе пратакол па арт. 19.11 КаАП «распаўсюд экстрэмісцкіх матэрыялаў».
Віну сваю на судзе дзяўчына не прызнала. Але ёй усё адно прызначылі 10 сутак арышту і пастанавілі канфіскаваць тэлефон.
Каментары