«У пінжаках ці з голым торсам на кані?» Удзельнікі саміту G7 патролілі Пуціна
Падчас абеду ў першы дзень саміту «Вялікай сямёркі» сусветныя лідары ўспомнілі пра знакамітыя фотаздымкі Уладзіміра Пуціна на кані з голым торсам і сталі разважаць, ці не варта і ім таксама распрануцца для фотасесіі, каб паказаць, наколькі рашуча яны настроеныя, піша «Бі-бі-сі».
Жартоўная гутарка пачалася з таго, што прэм'ер-міністр Вялікабрытаніі Борыс Джонсан, сядаючы за стол, спытаў іншых, што яму рабіць з пінжаком: застацца ў ім ці лепш зняць, перадаюць журналісты агенцтва «Франс-Прэс».
Прэм'ер-міністр Канады Джасцін Трудо адказаў, што лепш дачакацца афіцыйнай сумеснай фатаграфіі, а потым ужо здымаць пінжакі.
«Але ж мы павінны паказаць, што мы больш крутыя, чым Пуцін», — адгукнуўся Джонсан, на што Трудо прапанаваў: «Тады трэба зладзіць дэманстрацыю голых торсаў падчас верхавой язды», — маючы на ўвазе афіцыйную фотасесію Пуціна на прыродзе, якая стала глабальным мемам у 2009 годзе.
«Верхавая язда — найлепшае, што ёсць на свеце», — пагадзілася кіраўнік Еўракамісіі Урсула фон дэр Ляен, не згадваючы пра форму адзення.
У выніку сусветныя лідары сфатаграфаваліся ў пінжаках, а потым пачаліся абмеркаванні сур'ёзных тэмаў, дзеля якіх яны і прыехалі на саміт у Баварыі. Журналісты пасля таго мусілі пакінуць памяшканне.
Прапаганда рыхтуе грамадства да загадкавай «працяглай камандзіроўкі» Лукашэнкі39
Каментары