Фота: скрыншот з ютуб-канал «Мытныя органы»

З чаго ўсё пачалося?

Яшчэ 30 жніўня 2021 года набыла моц пастанова Савета міністраў, у адпаведнасці з якой грузавыя аўтамабілі, якія ўвозяць тавары з Літвы ў Беларусь, павінны абсталёўвацца электроннымі навігацыйнымі пломбамі.

Пры канцы лета 2021 года за абавязковае выкарыстанне такога дэвайсу трэба было заплаціць 5 базавых велічынь (145 рублёў, ці каля 60$ па тагачасным курсе).

Пазней, з 9 снежня 2021 года, гэтае патрабаванне распаўсюдзілі і на грузавы транспарт, які ідзе ў Беларусь з боку Польшчы. У дадатак да гэтага, улады павысілі кошт пломбы з 5 да 10 базавых велічынь. З ростам базавай велічыні ад 1 студзеня 2022 года цана электроннай пломбы паднялася да 320 рублёў.

Ад 1 мая бягучага года да Літвы і Польшчы дадалі Латвію, пасля чаго амаль кожны грузавік, які ўязджае ў Беларусь з боку ЕС, мусіць плаціць 320 рублёў (каля 120 даляраў па бягучым курсе) за выкарыстанне навігацыйнай пломбы.

Фота: тэлеграм-канал «Warshawka» — ПП «Варшавский мост»

Навігацыйныя пломбы

Каб падлічыць, колькі прыкладна грошай дзяржава мае ад навігацыйных пломбаў, трэба паглядзець на прапускную здольнасць памежных пунктаў. З яе вынікае, што за суткі Беларусь здольная прапусціць праз свае межы з ЕС 3300 грузавікоў (з улікам таго, што дагэтуль застаюцца закрытымі «Брузгі»).

Але трэба разумець, што прапускная здольнасць і фактычная колькасць транспарту, якая перасякае мяжу, — гэта рознае, тым больш, што беларускі бок рэгулярна скардзіцца на тое, што еўрапейскія краіны не выконваюць дамоўленасці па аб’ёмах аформленага транспарту.

Так, напрыклад, Дзяржапагранкамітэт рапартаваў, што за 7 ліпеня праз літоўскія і польскія пункты пропуску ў краіны Еўрасаюза прайшло ўсяго 51% і 35% фур ад нормы адпаведна. Латвійскія кантрольныя службы прапусцілі на сваю тэрыторыю 60%.

Некалькімі днямі раней ён сцвярджаў, што Літва і Польшча за суткі прапусцілі ў ЕС менш за 40% фур ад нормы. 

Сыходзячы з гэтых лічбаў, для падліку агульнай колькасці грузавікоў можна браць 40 адсоткаў ад прапускной здольнасць пунктаў пропуску.

Вынікае, што за 24 гадзіны праз межы Беларусі і ЕС праязджае каля 1300 грузавікоў. Значыць, за суткі толькі ад усталёўкі навігацыйных пломбаў Беларусь атрымлівае 156 тысяч даляраў. Ці каля 4,68 мільёна даляраў у месяц.

Збор за выезд за мяжу

Навігацыйныя пломбы — толькі частка ад таго, што дзяржава зарабляе на мяжы.

За выезд з Беларусі таксама трэба плаціць, але не па 10 базавых, як у выпадках з пломбамі, а толькі адну (32 рублі, ці каля 12$).

Падатак за перасячэнне мяжы аплачваюць тыя, хто едзе на транспарце масай да пяці тон. Краіна рэгістрацыі і грамадзянства не маюць значэння.

Падлічыць, колькі дакладна людзей сплачвае пошліну за выезд з Беларусі, складана — яе мусяць плаціць як легкавікі, так і частка аўтобусаў і грузавікоў, і не па ўсіх відах транспарту ёсць статыстыка. Прапускная здольнасць пунктаў пропуску, якія цяпер функцыянуюць на мяжы з ЕС, складае 5010 легкавых аўто ў суткі. Фактычная колькасць машын можа быць іншай. Згодна з адной з ліпеньскіх справаздач Дзяржпагранкамітэта, літоўскі бок прапускаў аўто на 50% ад дамоўленасцей, а польскі — на 40%.

Калі абапірацца на гэтыя даныя, вынікае, што за суткі межы Беларусі і ЕС перасякаюць не менш за 2000 легкавікоў. У пераліку на гэту колькасць сабраная пошліна агулам складае каля 24 тысяч даляраў за суткі. А калі дадаць да гэтага спісу маршруткі і малатанажныя грузавікі, то гэтая лічба можа дасягаць і 30 тысяч за суткі.

Электронныя чэргі

Наступная крыніца даходаў — бронь чаргі. Сэрвіс па браніраванні часу дасяжны на сямі пунктах пропуску з краінамі ЕС, ён карыстаецца попытам. Кошт паслугі — 1 базавая велічыня (32 рублі).

Калі браць для разліку толькі тры найбольш загружаныя памежныя пункты пропуску з сямі (Брэст, Бераставіца, Каменны Лог), то на браніраванні месцаў штодня дзяржава зарабляе не менш за 10 тысяч даляраў.

Фота: скрыншот з сайта belarusborder.by

Вынікае, што нават па сціплых падліках за суткі бюджэт краіны атрымлівае каля 40 тысяч даляраў на мясцовых сборах за пярэсячэнне мяжы і продажы броні. За месяц сума перасягае адзнаку ў 1,2 мільёна даляраў. 

Такім чынам, пасля адкрыцця межаў для руху пасажырскага транспарту Беларусь штомесяц атрымлівае амаль 6 мільёнаў даляраў (дакладней — 5,88 мільёна) толькі на тым, што абавязвае перавозчыкаў выкарыстоўваць навігацыйныя пломбы, спаганяе збор за выезд за мяжу і прадае бронь у чарзе. 

Паліва па спецыяльнай цане

Але і гэта не ўсё. З 19 мая на АЗС блізу пунктаў пропуску і лагістычных цэнтраў паднялі цэны на дызельнае паліва да 3,58 рубля за літр. Паралельна забаранілі кіроўцам фур з замежнай рэгістрацыяй запраўляцца на іншых АЗС, дзе літр ДП каштуе 2,46 рубля.

«Наша Нiва» — крыніца якаснай інфармацыі і бастыён беларушчыны

ПАДТРЫМАЦЬ «НН»

Чытайце таксама: 

Ад унітазаў да аўтазапчастак. Якія тавары завозяцца ў Беларусь па шэрых схемах і колькі на гэтым зарабляюць пасярэднікі

Клас
Панылы сорам
Ха-ха
Ого
Сумна
Абуральна

Хочаш падзяліцца важнай інфармацыяй ананімна і канфідэнцыйна?

Каб пакінуць каментар, калі ласка, актывуйце JavaScript у наладах свайго браўзеру