На беларускіх межах амаль зніклі чэргі з грузавікоў. Чаму так адбываецца?
Пачынаючы з канца восені мінулага года велізарныя чэргі з грузавікоў на межах Беларусі і ЕС сталі звыклай з'явай. У пікавыя часы кіроўцам даводзілася там стаяць больш чым па 10 дзён у кожны бок, а 5-7 дзён чакання ўвогуле сталі нормай. Аднак апошнімі днямі чэргі з грузавікоў амаль зніклі. «Наша Ніва» разбіралася, у чым прычына.
Праз шматкіламетровыя чэргі з грузавікоў прыкладна месяц назад у Беларусі нават з'явілася новая прафесія — чалавек, які трымае месца ў чарзе на мяжы. Але, мяркуючы па апошніх звестках, гэтыя людзі застануцца без працы.
Так, напрыклад, па стане на 16 гадзін 28 ліпеня на латвійскім кірунку зусім няма грузавікоў, якія чакаюць на выезд з Беларусі.
На пунктах пропуску з Літвой у чаканні выезду стаяць усяго каля 100 грузавых аўтамабіляў. Больш за ўсё машын у пункце пропуску «Прывалка», там назіраецца чарга з 60 грузавікоў. У пунктах пропуску «Відзы» і «Каменны Лог» чакаюць на выезд з Беларусі ўсяго па 20 грузавікоў. У «Катлоўцы» і «Беняконях» наогул няма чэргаў сярод фур.
На польскім кірунку адносна загружаным застаецца пункт пропуску «Бераставіца», там у чарзе на выезд з Беларусі стаяць больш за 160 велікагрузаў. У «Казловічах» сабралася ўсяго каля 10 грузавікоў.
Усе гэтыя лічбы выглядаюць смешнымі ў параўнаннем з тым, што назіралася на межах яшчэ ў першай палове ліпеня. Напрыклад, 8 ліпеня ў «Бераставіцы» ў чарзе на выезд у Польшчу было амаль 700 грузавікоў. А ўсяго некалькімі днямі раней, 4 ліпеня, у «Каменым лозе» была чарга з больш чым 1000 фур.
«Гэта ўсё санкцыі»
Спецыяліст у сферы лагістыкі патлумачыў «Нашай Ніве», што для людзей у тэме знікненне чэргаў з велікагрузаў не з'яўляецца чымсьці нечаканым.
«Гэта ўсё наступствы санкцый супраць Расіі, які былі прынятыя яшчэ ў красавіку. Пасля 10 ліпеня набылі сілу чарговыя абмежаванні, якія закранулі каля 150 мытных кодаў. Спіс вельмі істотны, закранае розныя галіны, таму вельмі скарацілася колькасць пазіцый, якія можна везці з Еўропы», — кажа лагіст.
Спецыяліст мяркуе, што бліжэйшым часам не варта чакаць таго, што чэргі зноў вернуцца.
«Абмежаванні дзейнічаюць з 10 ліпеня, але еўрапейцы дазволілі ўсім, хто паспеў загрузіцца да гэтай даты, вывезці тавары з Еўропы, колькі бы тыя не стаялі ў чарзе. Менавіта па гэтай прычыне, у пачатку месяца мы назіралі велізарнейшыя чэргі на нашых межах. Імпарцёры загадзя ведалі, што хутка спіс забароненых да імпарту тавараў павялічыцца, таму яны намагаліся максімальна запоўніць склады. Па тых пазіцыях, дзе гэта магчыма, закупляліся таварам на год наперад».
Спецыяліст адзначае, што праз гэтая змены ўжо пачалі зніжацца стаўкі на дастаўку тавараў у Беларусь. Па ягоных назіраннях, калі раней за дастаўку грузу з Германіі польскія і літоўскія перавозчыкі бралі па 5-6 тысяч еўра, то за тыдзень стаўкі панізіліся на 1-2 тысячы. Лагіст мяркуе, што гэта толькі пачатак, таму цэны на дастаўку ў Беларусь будуць падаць далей.
Уплыў новых санкцый адчулі на сабе і беларускія кіроўцы, якія працуюць у еўрапейскіх кампаніях.
«Калі палякі зразумелі, што з-за санкцый дастаўляць грузы ў Беларусь стала выгадней, чым рабіць гэта па Еўропе, многія пераключыліся на ўсходні кірунак. Многія нават паднялі зарплату кіроўцам, намагаліся ак мага часцей браць загрузкі на Беларусь, званілі і пыталі, ці гатовы ехаць у рэйс раней за запланаваны час. Цяпер настала цішыня, стаўкі падаюць, загрузак мала. Магчыма, зноў будуць працаваць унутры Еўропы. Праз санкцыі вазіць сюды цяпер амаль няма чаго», — дзеліцца дальнабойшчык.
«Наша Нiва» — бастыён беларушчыны
ПАДТРЫМАЦЬ
Каментары