У першым выпадку ў РАУС звярнуўся 52-гадовы жыхар раёна, які паведаміў, што збіраў журавіны ў балоцістай мясцовасці. Сабраўшы да абеду каля 30 кілаграмаў ягад, ён пакінуў іх у мяшку на ўскрайку лесу побач са сваім роварам, а сам адправіўся працягваць збор. Вярнуўшыся ўвечары, мужчына не знайшоў пакінутага мяшка і паведаміў пра гэта ў міліцыю.
Аператыўнікі хутка знайшлі выкрадальніка. Ім аказаўся 17-гадовы навучэнец адной з навучальных устаноў райцэнтра, які ў той дзень таксама адправіўся ў лес у ягады. Як хлопец растлумачыў, ён напярэдадні злоўжываў алкаголем, а таму замест збору ягад паўдня праспаў. Вяртацца дахаты без здабычы хлопцу не хацелася, таму, убачыўшы пакінуты без нагляду мех журавін, ён забраў яго сабе, пасля чаго за бясцэнак рэалізаваў скупшчыкам за 60 рублёў, а грошы патраціў на ўласныя патрэбы.
У другім выпадку ў міліцыю пра крадзеж паведаміў 27-гадовы жыхар раёна. Мужчына паскардзіўся, што захоўваў у гаспадарчай пабудове 165 кілаграмаў сабраных журавін, а тым часам праз сацсеткі падаў аб’яву аб іх продажы. Пакупнік, які адгукнуўся на аб'яву, агледзеў тавар, але яго нібыта не задаволіў запытаны кошт, таму ён з'ехаў. А на наступны дзень гаспадар выявіў, што з дзвярэй хлява сарваны замок, а ягады скрадзеныя.
Супрацоўнікі крымінальнага вышуку ўстанавілі, што непрацуючы 24-гадовы жыхар раёна вырашыў падзарабіць на перапродажы хадавога ў гэты сезон тавару — журавін. Мужчына прыехаў паглядзець прапанаваны ў аб’яве тавар. Убачыўшы, што гаспадар захоўвае сабраны ўраджай у хляве, які знаходзіцца дастаткова далёка ад дома і наводшыбе, вырашыў не плаціць за яго, а вярнуцца ноччу і забраць бясплатна.
Супраць абодвух парушальнікаў заведзеныя крымінальныя справы за крадзеж.
