У Дзятлаўскім раёне вясковец пагражаў сям'і ўласнаручна зробленым арбалетам
Жыхарка Дзятлаўскага раёна звярнулася ў міліцыю і паскардзілася на мужа, які пагражаў ёй і дзецям забойствам. Прыладай пагрозаў быў арбалет, які мужчына зрабіў сам, паведаміў Следчы камітэт.
На месца адправілася следча-аператыўная група. У двары дома сапраўды быў знойдзены арбалет, яго адправілі на даследаванне. Высветлілася, што зброя з'яўляецца класічным арбалетам вінтовачнага тыпу, вырабленая ў хатніх умовах і адносіцца да кідальнай зброі.
Гаспадар арбалета не змог растлумачыць матывы сваіх дзеянняў і адмаўляў, што пагражаў каго-небудзь забіць. Аднак мужчына прызнаў, што быў моцна п'яны і нічога не памятае.
Са слоў вяскоўца, арбалет ён сканструяваў для асабістых мэтаў.
Раней мужчына ўжо быў судзімы за крадзеж і хуліганства. Цяпер яго абвінавачваюць у пагрозе забойствам і незаконным вырабе кідальнай зброі. Пакуль следчыя чакаюць судовай псіхіятрычнай экспертызы.
Каментары