«Пытанні вырашаюцца», — заявіў пастаянны прадстаўнік Беларусі пры ААН.
Каментуючы магчымыя тэрміны аднаўлення працы пасольства ЗША ў Беларусі, Валянцін Рыбакоў у эфіры Беларусь-1 звярнуў увагу на тое, што амерыканская дыпмісія ў Мінску афіцыйна ніколі не закрывалася, піша БелТА.
«Яно з'ехала з Беларусі, пераехала ў Літву. Як тады сцвярджаў амерыканскі бок, гэта было звязана з пытаннямі бяспекі. Пачаліся ваенныя дзеянні на тэрыторыі суседняй Украіны, і пад гэтай падставай яны перабраліся ў Літву. Амерыканскія дыпламаты маюць усе неабходныя дакументы — візы, дазволы. Што датычыцца вяртання пасольства, амерыканцы паставілі перад намі пэўныя пытанні, вырашэнне якіх, з іх пункту гледжання, дазволіць ім цалкам пераехаць у Мінск. Пытанні вырашаюцца», — заявіў пастаянны прадстаўнік Беларусі.
Таксама Валянцін Рыбакоў расказаў пра магчымасць прамога авіярэйсу з ЗША.
Ён адзначыў, што такія пытанні, як адкрыццё прамых авіярэйсаў, заўсёды вырашаюцца вельмі доўга. Напрыклад, казахстанскія авіялініі працуюць над арганізацыяй прамога авіязлучэння з ЗША ўжо восем гадоў.
«Каб адкрыць прамы рэйс, неабходна вырашыць цэлы шэраг розных пытанняў: гэта і пытанні бяспекі, і сертыфікацыі самалётаў, пілотаў, персаналу, аэрапорта і гэтак далей. Таму мы працуем. Гэта адно з тых пытанняў, якія мы пастаянна абмяркоўваем на перамовах з амерыканскім бокам», — расказаў дыпламат.
Каментары