Былы расійскі футбаліст адсудзіў у фэйсбука больш за мільён даляраў за цэнзураванне прозвішча
Былы футбаліст зборнай Расіі Дзмітрый Хахлоў адсудзіў у фэйсбука 65 мільёнаў расійскіх рублёў (крыху больш за мільён даляраў) за тое, што сацсетка цэнзуравала ягонае прозвішча, прымаючы яго за абразу па нацыянальнай прыкмеце.
Судовая цяганіна цягнулася амаль год.
«Ні я, ні мае сябры і знаёмыя не можам нармальна выкарыстоўваць Facebook і Instagram. Мне шмат людзей патэлефанавалі і сказалі, што пры любым згадванні блакуецца прозвішча. А яны трапляюць у бан на тыдзень», — скардзіўся футбаліст.
Хахлоў патрабаваў у сацсеткі 150 млн рублёў, але расійскі Сонцаўскі суд знізіў ацэнку маральнай шкоды. Цяпер, апрача выплаты кампенсацыі Facebook будзе абавязаны на працягу месяца разблакаваць усе згадкі пра Хахлова ў сацсетцы.
46-гадовы былы паўабаронца Дзмітрый Хахлоў гуляў за расійскую футбольную зборную ў 1996-2005 гадах.
Каментары