Сахашчык сустракаўся з кіраўніком УСУ Залужным, але вырашыў пакінуць гэта ў таямніцы
Як стала вядома «Нашай Ніве» з інфармаваных крыніц, сустрэча Валерыя Сахашчыка — «міністра абароны» ў кабінеце Ціханоўскай — з кіраўніком УСУ Валерыем Залужным адбылася яшчэ ў лістападзе 2022 года. Сахашчык не стаў пра яе паведамляць. Але ў першы дзень новага года сэлфі двух афіцэраў з'явілася ў сеціве.
Сустрэча Сахашчыка і Залужнага адбылася ў Кіеве ў лістападзе 2022 года. Яна прайшла ў цёплай і прыязнай атмасферы, кажуць людзі, блізкія да колаў беларускай апазіцыі. Выявілася, што Залужны ў даўнія часы бываў у дэсантнай часці, якой кіраваў Сахашчык.
Аднак толькі цяпер у інтэрнэт трапіла супольнае фота Сахашчыка і Залужнага з той сустрэчы.
Пра дэталі сустрэчы, а таксама ўзнятыя на ёй тэмы дакладна невядома.
Сам Валерый Сахашчык нічога не каментуе.
Па інфармацыі «Нашай Нівы», у лістападзе таксама мелі адбыцца сустрэчы Сахашчыка з іншымі прадстаўнікамі ўкраінскіх Узброеных сіл і сілавых структур, у прыватнасці, Сіл спецыяльных аперацый.
58-гадовы Валерый Сахашчык — «міністр абароны» ў Аб'яднаным пераходным кабінеце. Былы камандзір брэсцкай дэсантнай часці, падпалкоўнік, які пасля выхаду ў адстаўку збудаваў паспяховы прыватны будаўнічы бізнэс.
Гэта самы аўтарытэтны вайсковец, які публічна далучыўся да руху супраць дыктатуры за апошнія гады.
49-гадовы Валерый Залужны — ужо камандуючы ўкраінскай арміяй, пад кіраўніцтвам якога ўкраінцы спынілі, а потым на многіх кірунках і разграмілі расійскіх агрэсараў.
Нагадаем, што ў снежні Валерый Сахашчык заявіў, што вядзецца падрыхтоўка да стварэння новай вайсковай часці беларусаў ва Украіне, якая будзе мець цяжкія ўзбраенні.
Чытайце таксама: Хто такі Валерый Сахашчык, які ўзначаліў сілавы блок у кабінеце Ціханоўскай
Чытайце таксама: The New Yorker: Валерый Залужны хаваў сапраўдны план абароны Украіны ад усіх, у тым ліку ад Зяленскага і ад амерыканцаў
У дадзены момант на баку Украіны ваююць некалькі беларускіх падраздзяленняў, сабраных з дабраахвотнікаў, большасці з якіх давялося пакінуць Радзіму, ратуючыся ад лукашэнкаўскіх рэпрэсій.
«Полк Кастуся Каліноўскага», «Полк Пагоня», «Батальён Тэрор» і іншыя фарміраванні — гэта аформленыя баявыя адзінкі. Таксама беларусы ваююць у іншых падраздзяленнях, складзеных з украінцаў.
Імаверна, беларусы — найбольшая нацыянальная група замежнікаў у вайне супраць расійскага імперыялізму ва Украіне.
Дагэтуль існуе праблема нізкай скаардынаванасці палітычных сілаў, якія рэпрэзентуюць Беларусь на міжнароднай арэне, і дабраахвотнікаў.
Цяпер чытаюць
Прабітыя лёгкія, разарваная печань і сэкс з малалетняй: што адбываецца ўнутры беларускай міліцыі і як начальства гэта хавае19
Прабітыя лёгкія, разарваная печань і сэкс з малалетняй: што адбываецца ўнутры беларускай міліцыі і як начальства гэта хавае
«З расіян-наведнікаў працэнтаў 70 аказваліся ватнікамі». Экс-гід з музея ВАВ, якога затрымлівалі яго ж экскурсанты, цяпер папулярны ў Варшаве — пагутарылі з ім1414
Каментары