ISW: Лукашэнка не хоча ўступаць у вайну з Украінай і стварае інфармацыйны фон, каб супраціўляцца расійскаму ціску
Галоўнай тэмай сённяшняга бюлетэня вашынгтонскага Інстытута вывучэння вайны (ISW) сталі заявы Аляксандра Лукашэнкі і яго міністра абароны Віктара Хрэніна аб ваенных пагрозах Беларусі з боку Украіны і НАТА.
Лукашэнка ў чацвер заявіў: «Украіна пад любой падставай, хутчэй за ўсё, спрабуе ўцягнуць войскі дзяржаў-членаў НАТА ў канфлікт. Усё гэта пацвярджаецца нядаўнімі падзеннямі ракет на тэрыторыю Польшчы». Хрэнін, са свайго боку, сказаў: «Не хачу, каб нехта палохаўся, што заўтра пачнецца вайна. І прэзідэнт падкрэсліў у сваім дакладзе: непасрэднай падрыхтоўкі да вайны няма».
Прадстаўнік Галоўнага ўпраўлення разведкі міністэрства абароны Украіны Вадзім Скібіцкі ў сераду заявіў у тэлеэфіры: «На сённяшні дзень мы не адзначаем там стварэння магутнай наступальнай групоўкі, якая была разгорнута на тэрыторыі Беларусі на працягу студзеня-лютага».
ISW у заявах Лукашэнкі бачыць дзве мэты. Першая — ствараць напружанасць на беларуска-ўкраінскай мяжы і тым самым прымушаць Украіну трымаць там буйныя ваенныя сілы, якія маглі б быць задзейнічаны на іншых напрамках.
Другую і больш важную мэту эксперты Інстытута прачытваюць у тым, што беларускія афіцыйныя асобы асноўны акцэнт робяць на нібы нарастаючай пагрозе Беларусі з боку Захаду. На іх думку, такім чынам Мінск стварае «інфармацыйныя ўмовы» для таго, каб супраціўляцца націску з боку Масквы для прамога ўдзелу беларускай арміі ў вайне з Украінай.
Верагоднасць прамога ўдзелу беларускіх войскаў у вайне ў ISW па-ранейшаму ацэньваюць як вельмі нізкую.
Каментары