Праз «пагрозу жыццю і здароўю грамадзян». У Мінску да канца года перакрыюць вуліцу Галадзеда
Выехаць па ёй з Чыжоўкі аўтамабілісты не змогуць ужо з 10 мая.
Рашэнне Мінгарвыканкама пра перакрыццё руху па вуліцу Галадзеда з'явілася на нацыянальным прававым інтэрнэт-партале.
Участак руху ад скрыжавання з вуліцай Убарэвіча да вуліцы Свіслацкай будзе закрыты з 10 мая і на даволі працяглы перыяд: зноў ездзіць па гэтым участку дарогі цераз Свіслач у Чыжоўку можна будзе толькі з 13 снежня.
Гарадскія ўлады афіцыйна адзначылі, што перакрыццё звязана з «пагрозай бяспецы дарожнага руху, у тым ліку жыццю і (або) здароўю грамадзян».
За пачварным чынавецкім канцылярытам хаваецца трывіяльны капітальны рамонт моста цераз Свіслач.
Яшчэ ў кастрычніку 2024 года дырэктар прадпрыемства «Гардарбуд» Сяргей Панёў паведамляў пра рамонт моста на вуліцы Галадзеда:
«Мост на вуліцы Галадзеда будзе рамантавацца, хутчэй за ўсё, з поўным перакрыццём руху. Паколькі існуюць мясцовыя шляхі аб'езду без значнага павелічэння маршруту. Такія меры дазволяць паскорыць тэрміны выканання работ», — тлумачыў летась Панёў.
Мост па Галадзеда не адзіны аб'ект інфраструктуры ў Мінску, які плануюць адрамантаваць у 2025 годзе.
Нядаўна гараджане ўжо сутыкнуліся з сур’ёзнымі зменамі руху ў цэнтры: з 8 лютага з-за рамонту пуцеправода па вуліцы Маскоўскай раніцамі горад стаіць у корках. Работы тут працягнуцца да 1 снежня.
Паралельна рыхтуецца рамонт яшчэ прыкладна 10 аб’ектаў, сярод якіх пост цераз Свіслач па вуліцы Пуліхава, два пуцеправоды на вуліцы Даўгабродскай — праз вуліцу Ванеева і праз чыгунку Масква — Мінск і пуцеправод праз чыгунку на вуліцы Брэст-Літоўскай.
«Наша Нiва» — бастыён беларушчыны
ПАДТРЫМАЦЬ
Каментары