Генштаб УСУ заявіў, што армія РФ зноў прымяніла супраць Украіны іранскія дроны
У сваёй чарговай зводцы Генеральны штаб УСУ заявіў, што за мінулыя суткі ўкраінскія вайскоўцы «збілі 14 ударных дронаў тыпу «Shahed-136». Такім чынам Украіна пацвердзіла, што краіна ўпершыню за некалькі тыдняў зноў падверглася ўдару беспілотнікаў-камікадзэ іранскай вытворчасці.
Украінскія вайскоўцы не ўдакладняюць, супраць якіх аб'ектаў былі накіраваныя ўдары беспілотнікаў і ці патрапілі якія-небудзь з іх у цэль.
У ноч на сераду карыстальнікі сацыяльных сетак пачалі размяшчаць відэаролікі, у якіх чутная характэрная для іранскіх дронаў праца рухавіка.
Раніцай кіраўнік Днепрапятроўскай абласной адміністрацыі Валянцін Разнічэнка паведаміў у сваім тэлеграм-канале, што сілы СПА збілі «ўсе восем варожых беспілотнікаў, якія вораг накіраваў на вобласць». Па яго словах, «папярэдне, гэта былі «Shahed-136».
Паведамлялася аб нападах дронаў і ў іншых рэгіёнах краіны.
Апошні раз армія РФ выкарыстала дроны «Шахед» падчас налётаў 17 лістапада, з тых часоў пра іх ужыванне не паведамлялася.
Каментары