На Нацыянальным прававым партале з'явіўся тэкст Закона «Аб амністыі ў сувязі з Днём народнага адзінства». Ён набыў моц з моманту яго апублікавання. Што ў яго тэксце?
Пад яго дзеянне трапляюць:
- непаўналетнія,
- пенсіянеры,
- цяжарныя жанчыны,
- адзінокія мужчыны і жанчыны, якія маюць непаўналетніх дзяцей, калі яны здзейснілі злачынства не супраць дзіцяці,
- інваліды I і II групы;
- хворыя на туберкулёз і хворыя на рак ад другой клінічнай групы,
- ВІЧ-інфікаваныя з 3-й і 4-й стадыямі захворвання,
- воіны-інтэрнацыяналісты, а таксама асобы, якія атрымалі раненне ў арміі ці іншых сілавых структурах,
- пацярпелыя ад аварыі на ЧАЭС ці іншых радыяцыйных аварый.
Прадстаўнікі пералічаных вышэй груп вызваляюцца ад крымінальнай адказнасці і папярэдняга расследавання.
На іншых таксама распаўсюджваецца амністыя:
- калі яны асуджаныя з адтэрміноўкай ці ўмоўным непрымяненнем пакарання або без яго прызначэння,
- калі яны здзейснілі злачынствы, якія не маюць вялікай грамадскай значнасці,
- якія здзейснілі менш цяжкія злачынствы і адсядзелі чвэрць тэрміну,
- якім прызначана пакаранне ў выглядзе арышту.
На адзін год зменшаць пакаранне «хімікам» і асуджаным да пазбаўлення волі, а таксама вызваленым ўмоўна-датэрмінова і тым, каму калонію замянілі на «хімію» ці «хімію» — на грамадскія працы.
Амністуюць тых, каму да вызвалення засталося менш за год.
Важна: Пад амністыю не трапляюць палітвязні. У тэксце закона пералічаны цэлы шэраг артыкулаў «тэрарыстычнай і экстрэмісцкай скіраванасці», на якія не распаўсюджваецца дзеянне Закона.
Таксама Закон не закране асуджаных па цяжкіх і асабліва цяжкіх злачынствах, а таксама асуджаных на 12 гадоў і больш. А таксама тых, хто на момант падпісання закона не пакрыў шкоду ці хто з'яўляецца злосным парушальнікам парадку.
Нагадаем, што па праекце закона планавалі вызваліць каля 4500 асуджаных, у тым ліку з месцаў пазбаўлення волі — 1600, з іх 10 непаўналетніх, з папраўчых устаноў адкрытага тыпу («хіміі») — 500, з крымінальна-выканаўчых інспекцый — 2500, а таксама скараціць тэрмін на адзін год практычна 4 тысячам асуджаных.
Каментары