У другі дзень раптоўнай праверкі боегатоўнасці да яе пачынаюць прыцягваць новыя часці і злучэнні Узброеных сіл Беларусі. Так, падраздзяленні сіл неадкладнага рэагавання з саставу 11-й (Слонім) і 19-й (Заслонава, Лепельскі раён) механізаваных брыгад атрымалі задачы здзейсніць марш на палігоны УС РБ, у тым ліку з пераадоленнем водных перашкод.
Ад 11-й брыгады да праверкі пакуль прыцягнутыя 2 танкавыя роты 7 асобнага танкавага батальёна — гэта мінімум 20 танкаў Т-72Б УС РБ, звяртае ўвагу «Беларускі Гаюн».
Падраздзяленні павінны будуць здзейсніць марш з пункта пастаяннай дыслакацыі на палігон «Гожскі» ў Гродзенскім раёне (з пераадоленнем воднай перашкоды, хутчэй за ўсё — у Лідскім раёне). Вядома, што падраздзяленне было паднятае па трывозе сёння ў 3:00 (па мінскім часе).
Акрамя гэтага, ёсць інфармацыя, што да праверкі будуць прыцягнутыя:
— 40-вы асобны механізаваны батальён 11 амбр,
— 105-ты асобны механізаваны батальён 11 амбр,
— інжынерна-сапёрны батальён 11 амбр.
Пра пачатак руху названых падраздзяленняў з пункта пастаяннай дыслакацыі пакуль не паведамлялася.
Каментары