Перабежчык, які ўцёк з Паўночнай Карэі на сваім самалёце, дажыў да 90 гадоў

21 верасня 1953 года, праз паўтара месяца пасля падпісання перамір’я ў Карэйскай вайне, Но Гым Сок, лейтэнант ВПС Паўночнай Карэі, адарваўся ад свайго патруля з 16 самалётаў побач са сталіцай краіны Пхеньянам, праляцеў незаўважаным ў Паўднёвую Карэю на сваім савецкім знішчальніку МіГ і прызямліўся на вайсковым аэрадроме, на якім месціліся ВПС ЗША і летчыкі з саюзных краін.

21-гадовы пілот, ветэран звыш 100 баявых вылетаў, уцёк ад камунізму і «падарыў» ВПС ЗША першы непашкоджаны савецкі МІГ. Праз год уцякач атрымаў новае імя — Кенэт Роу — і пачаў новае жыццё ў Амерыцы як студэнт каледжа. Хлопец, калі прызямліўся на базу саюзнікаў, зусім не ведаў ангельскай мовы, а вакол яго пачалася мітусня: ніхто не ведаў, што з ім рабіць. 

Прызямленне Кенэта тады стала галоўнай навіной у СМІ. «Чырвоны МіГ прызямліўся каля Сеула і здаўся саюзнікам», — паведамілі тады New York Times у сваім чарговым выпуску на першай галоўнай старонцы. 

«Я адшпіліў кіслародную маску і ўпершыню ў жыцці ўдыхнуў вольнае паветра», — узгадваў Но Гым Сок у сваіх мемуарах «МіГ-15 да свабоды» (1996). Тады, па ўспамінах, ён прыпаркаваўся сярод амерыканскіх ваенных самалётаў, сарваў з прыборнай панэлі фатаграфію Кім Ір Сена (тагачаснага лідара Паўночнай Карэі) у рамцы, выскачыў з кабіны і кінуў фатаграфію на зямлю. Дзясяткі лётчыкаў кінуліся да яго, а камандуючы пятай паветранай арміяй генерал-лейтэнант Сэмюэль Андэрсан паспяшаўся на базу.

Павялічыць

Кенэт Хіл Роу нарадзіўся 10 студзеня 1932 года ў мястэчку з насельніцтвам 10 000 чалавек на поўначы акупаванага Японіяй Карэйскага паўвострава. Яго бацька быў адміністратарам японскага прамысловага кангламерату ў Карэі, а яго маці была звычайнай хатняй гаспадыняй. У 1949 годзе Кенэт стаў курсантам ваенна-марскога вучылішча. Пазней, у 19 гадоў, ён быў пераведзены ў ВПС і прайшоў курс падрыхтоўкі на рэактыўных знішчальніках у савецкіх лётчыкаў у Маньчжурыі.

Затым Но Гым Сок увайшоў у Камуністычную партыю Паўночнай Карэі і, паводле яго слоў, «прыкідваўся фанатыкам камунізму» падчас Карэйскай вайны. У той жа час яго бацька-антыкамуніст і маці-каталічка моцна паўплывалі на тое, каб іх сын імкнуўся да жыцця ва ўмовах дэмакратыі. Яшчэ з моманту заканчэння Другой сусветнай вайны і з'яўлення камуністычнага рэжыму Кім Ір Сена на поўначы Карэі Но Гым Сок думаў аб тым, як дабрацца да Амерыкі.

Праз восем тыдняў пасля перамір'я ў Карэі ён аддзяліўся ад свайго патруля, падняўся на вышыню 7000 м і павярнуў на поўдзень для 13-хвіліннага палёту праз дэмілітарызаваную зону да горада Кімпхо.

Яму пашанцавала: амерыканскі супрацьпаветраны радар на поўнач ад авіябазы Кімпхо быў адключаны на планавае тэхнічнае абслугоўванне, і ні амерыканскія самалёты ў паветры, ні зенітчыкі на зямлі яго не заўважылі.

Такі ўчынак Но Гым Сока можа тлумачыцца тым, што ўжо на позніх этапах Карэйскай вайны ВПС ЗША скінулі над Паўночнай Карэяй улёткі з прапановай узнагароды ў 100 000 даляраў першаму паўночнакарэйскаму пілоту, які дэзертуе з непашкоджаным МіГам. Але Но Гым Сок у сваіх мемуарах сцвярджаў, што нічога не ведаў пра гэту ўзнагароду, і казаў, што проста хацеў жыць свабодным жыццём.

Кенэт Роу прыехаў у Злучаныя Штаты ў траўні 1954 года і адразу стаў знакамітасцю. Ён быў прадстаўлены Рычарду Ніксану (яшчэ на той момант віцэ-прэзідэнту ЗША), у яго браў інтэрв'ю Дэйв Гараўэй у праграме «Сёння» на канале NBC, ён удзельнічаў у радыёперадачах «Голасу Амерыкі». Таксама Кенэт атрымаў дыплом інжынера ва Універсітэце Дэлавэра і працаваў інжынерам у буйных абаронных і аэракасмічных кампаніях. Пазней ён стаў прафесарам інжынерыі ў Авіяцыйным універсітэце Эмбры-Рыдла ў Дэйтана-Біч. Кенэт Роу памёр ва ўзросце 90 год 26 снежня у Фларыдзе. Пра яго смерць паведаміла ягоная дачка Боні Роу. 

Калі Кенэт Роу прыехаў у ЗША, яго самалёт МіГ-15біс таксама прывезлі для дадатковых лётных выпрабаванняў амерыканскіх ВПС. Праз сем дзесяцігоддзяў гэты самалёт усё яшчэ існуе і знаходзіцца ў Нацыянальным музеі ВПС ЗША недалёка ад Дэйтана, штат Фларыда. Чырвоная зорка на знішчальніку была перафарбавана, а сам ён быў выстаўлены разам з амерыканскім знішчальнікам F-86 Sabre у якасці памяці пра баі падчас Карэйскай вайны на частцы карэйскай паветранай прасторы, вядомай як «Алея МіГаў» (месца, дзе ўпершыню адзін супраць аднаго ваявалі амерыканскія і савецкія знішчальнікі).

Чытайце яшчэ:

У ЗША на волю выйшла адна з самых вядомых шпіёнак халоднай вайны

Мемуары прынца Гары паступілі ў продаж і карыстаюцца вялікай папулярнасцю

Сабака Патрон. Хто і колькі зарабляе на папулярным джэк-расел-тэр'еры

• 23
• 0
• 1
• 0
• 4
• 3
• 1
• 0