Ягонае імя з'явілася ў спісе 3 студзеня. Сілавікі вінавацяць мужчыну ў «фінансаванні тэрарыстычнай дзейнасці».
Размова пра 43-гадовага Мікалая «Ніка» Кацалапава. Ён скончыў фізфак БДУ, пасля ўніверсітэта пайшоў працаваць у кампанію InterVelopers, якая неўзабаве пачала супрацоўнічаць з «Варгеймінгам». З 2002 года Мікалай пачаў кіраваць развіццём бізнэсу ў кампаніі і займае гэтую пасаду дагэтуль.
Кацалапаў — непублічны чалавек. З таго, што пісалі пра яго: некалі набыў кватэру за 675 тысяч даляраў на вуліцы Чэхава ў Мінску, гэта раён Стэлы.
Імя, імя па бацьку і год нараджэння чалавека, унесенага ў спіс «тэрарыстаў», цалкам супадаюць з асабістымі дадзенымі сузаснавальніка «Варгеймінга».
Наколькі разумее «Наша Ніва», бізнэсовец на волі.
Мы спрабавалі звязацца з Мікалаем Кацалапавым па публічна даступных кантактах, але адказу не атрымалі.
Таксама мы выслалі запыт на мэйл прэс-службы кампаніі Wargaming — калі будзе адказ на зварот, мы яго апублікуем.
Бізнэсовец, па звестках CSE, валодае каля 17% акцый «Варгеймінга» і займаецца шэрагам інвестыцыйных праектаў. «Ежедневник» традыцыйна ўключаў яго ў спіс найбольш уплывовых беларускіх бізнэсоўцаў — у рэйтынгу за 2021 год ён заняў 18 месца.
Агульны кошт кампаніі Wargaming ацэньваецца на больш за мільярд даляраў. Пасля пачатку масавых рэпрэсій у Беларусі мінскі офіс кампаніі быў рэлакаваны. На сёння толькі ў Wargaming Vilnius, згодна з даступнымі данымі, працуе 987 чалавек. Цэнтральны офіс кампаніі месціцца ў Нікасіі, Кіпр. Акрамя таго, існуюць офісы ў Кіеве (Украіна), Белградзе (Сербія), Празе (Чэхія), Варшаве (Польшча), Остыне і Чыкага (ЗША), Шанхаі (Кітай) ды іншых гарадах.
Цяпер адзін з самых багатых і паспяховых беларусаў прызнаны ўладамі «тэрарыстам» за «фінансаванне тэрарыстычнай дзейнасці». Беларусаў у гэты спіс КДБ апошнія гады ўносіць па палітычных матывах — праціўнікаў Аляксандра Лукашэнкі. Невядома, каму менавіта ахвяраваў грошы Мікалай Кацалапаў.
У Беларусі прызнаныя тэрарыстычнымі чатыры арганізацыі, звязаныя з падзеямі 2020 года:
- АГСБ;
- «Супраціў», у які ўваходзяць «Кіберпартызаны», «Дружыны народнай самаабароны» і «Буслы ляцяць»;
- BYPOL разам з «Сітуатыўна-аналітычным цэнтрам» і планам «Перамога»;
- тэлеграм-каналы NEXTA, NEXTA Live і LUXTA.
Калі вы ведаеце на гэтую тэму больш, пішыце рэдактару «Нашай Нівы» ў ТГ @nn_editor, на [email protected] ці [email protected]. Альбо пішыце асабіста тым журналістам і рэдактарам «Нашай Нівы», якіх вы ведаеце і якім давяраеце (лепш — у сігнал ці тэлеграм).
«Наша Нiва» — бастыён беларушчыны
ПАДТРЫМАЦЬЧытайце яшчэ:
70-гадоваму мужчыну пагражае да 15 гадоў за каментары. Распавядаем пра самага пажылога «тэрарыста» з Беларусі
Каментатары і справакаваны КДБ мужчына. У «тэрарысты» цяпер масава запісваюць за выказванні. Расказваем пра новыя імёны ў спісе
ГУБАЗіК расказаў пра жанчыну, якая «прыйшла пакаяцца». Пасля яе адправілі ў калонію і ўнеслі ў «спіс тэрарыстаў»
Гнілое, затое нядорага. Як папулісцкі ўказ Лукашэнкі аб абмежаванні нацэнкі ўплывае на ўсіх удзельнікаў ланцужка паставак гародніны5
Каментары