У закрытым чаце на трох чалавек выказаўся аб магчымым пачатку вайны на тэрыторыі Беларусі — асудзілі да калоніі
Суд Ленінскага раёна Магілёва 2 лютага прызнаў вінаватым 41-гадовага Міхаіла Карпешку за абразу Аляксандра Лукашэнкі (ч. 1 арт. 368 Крымінальнага кодэкса), паведамляе «Вясна».
Справу разглядала суддзя Вікторыя Палякова.
Паводле матэрыялаў абвінавачання, Міхаіл пасля пачатку ваеннага ўварвання расійскіх войскаў ва Украіну ў сакавіку 2022 года пакінуў паведамленне ў «публічным чаце ў месенджары Telegram, у якім выказаў перажыванні пра магчымы пачатак вайны на тэрыторыі Беларусі.
У Карпешкі і двух яго сяброў быў свой чат на трох чалавек, прычым закрыты.
Крымінальная справа была распачатая толькі праз 9 месяцаў — у лістападзе 2022 года.
Сведкамі на судзе выступілі двое іншых удзельнікаў чата — сябры Карпешкі, якіх раней прыцягвалі да адміністрацыйнай адказнасці па арт. 19.11 КаАП Рэспублікі Беларусь.
Суд пастанавіў прызнаць Карпешку вінаватым і прызначыў яму пакаранне ў выглядзе пазбаўлення волі тэрмінам на адзін год і шэсць месяцаў ва ўмовах агульнага рэжыму.
Каментары