Новы пікет ля польскага консульства — пад відам «незадаволеных палякаў» сагналі бюджэтнікаў і БРСМ. Вось хто на фота
Чарговая акцыя супраць закрыцця межаў прайшла каля Генконсульства Польшчы ў Гродне. БелТА піша, што арганізаваў пікет Саюз палякаў у Беларусі. Але ці былі там палякі? Разгледзелі фота.
На калажы зверху — пажылыя людзі, што прыйшлі на акцыю, хутчэй за ўсё — з саюза ветэранаў або КПБ. Гэтым разам іх меней, чым на мінулым пікеце, але яны стаяць з абсалютна ідэнтычным плакатам у тым жа месцы.
Прыйшлі і бээрэсэмаўцы разам з прадстаўнікамі «Белай Русі» — гэтым разам іх меней і на першым плане іншыя людзі. На гэтым фота таксама сакратар гарадзенскага БРСМ Уладзіслаў Мандзік, а адразу за ім — штатная актывістка БРСМ Яна Мазавецкая. Яны былі і на пікеце 13 лютага, і на папярэдніх.
Астатнія ў шэрагу — таксама актывісты БРСМ і прафкамаў універсітэтаў, толькі менш медыйныя. Да прыкладу, у цэнтры калоны з чырвона-зялёным сцягам стаіць актывіст прафкама Гродзенскага дзяржаўнага ўніверсітэта 20-гадовы Андрэй Майстроў (на другім фота ён у сінім спартовым касцюме).
Каля яго стаяў і з усіх сіл «не аддаваў Беларусь» ягоны «таварыш» па няшчасці Антон Вашкевіч.
А вось кіраўніца гарадзенскай «Белай Русі» Святлана Вараніца з плакатам з мінулага пікета.
Засвяцілася Ірына Галайда, старшыня камісіі па працы з моладдзю Савета ветэранаў Кастрычніцкага раёна горада Гродна. Яна часта ходзіць на такія пікеты.
Гэтыя дзве актывісткі «Белай Русі» на першым плане таксама былі на мінулым пікеце.
Ад гродзенскага Саюза палякаў выступае адзін пажылы мужчына — 67-гадовы Казімір Знайдзінскі, які ўзначальвае гродзенскі філіял праўладнай часткі Саюза палякаў з 2007 года.
Знайдзінскі — некалі вядомы футбаліст і другі ў гісторыі арбітр ФІФА з Беларусі, які цяпер узначальвае Гродзенскую спартыўную дзіцяча-юнацкую школу алімпійскага рэзерву №1. Ягоная галоўная прэтэнзія — яму будзе больш складана ездзіць на могілкі да сваякоў.
Агулам гэтым разам пікет атрымаўся меншы па колькасці ўдзельнікаў. Невядома, колькі ў ім паўдзельнічала сапраўдных палякаў, але, калі меркаваць па фота з дзяржСМІ, гэта лічаныя людзі.
«Наша Нiва» — бастыён беларушчыны
ПАДТРЫМАЦЬПрывезлі нават бээрсээмаўца з Зэльвы. Хто пікетаваў учора пад польскім генконсульствам у Гродне
Хто тая прафсаюзная актывістка з МАЗа, якая папрасіла Лукашэнку разабрацца ў ютубе з «беглымі»?12
Каментары