«Сілавікам рэспект. Сялусе ганьба». Бондарава прыдумала мянушку для нявесткі Лукашэнкі
Прарасійская даносчыца, упэўненая ў сваёй беспакаранасці, пайшла ў лабавую атаку на блізкае кола Аляксандра Лукашэнкі.
Прычынай нападак стала тое, што маладыя беларускія блогеры і артысты, якіх Вольга Бондарава вінаваціла ў садаміі і разбэшчванні моладзі, знайшлі абарону пад крылом Ганны Лукашэнкі, больш вядомай пад творчым псеўданімам Ганна Сялук.
Дзім Дзімыч (Дзмітрый Сіўчык), Улька Пулька (Ульяна Сталярова), Анджыліша (Ангеліна Міхалёва), Улад Кабякоў і іншыя маладыя спевакі і інтэрнэт-зоркі, якіх Бондарава цкуе літаральна кожны дзень, актыўна ўдзельнічаюць у дзяржаўных мерапрыемствах, каб даказаць сваю лаяльнасць і абараніцца ад нападак даносчыцы.
Гэтыя артысты і блогеры звязаныя з прадзюсарскім цэнтрам «Флагман М'юзік», які быў створаны ў лістападзе 2020 года, у хуткім часе пасля таго, як у Беларусі пачалі забараняць папулярных выканаўцаў, якія падтрымалі пратэсты. Гэты ж цэнтр прасоўваў найбольш вядомыя песні Сялук.
Таксама маладых блогераў прыцягнулі перад апошнімі прэзідэнцкімі выбарам да ўдзелу ў прапагандысцкім «Марафоне адзінства» ў падтрымку Аляксандра Лукашэнкі, працоўнай групай якога кіравала Ганна Сялук. Пасля гэтага нападаць на іх ужо было нязручна, а прапагандысты з «Жоўтых зліваў» нават заступіліся за блогераў, па пунктах патлумачыўшы Бондаравай, чаму яна не мае рацыі.
Але на няўрымслівую даносчыцу гэтыя строгія вымовы не аказалі прафілактычнага ўздзеяння. Бондарава пачала нападаць на саму Сялук, называючы яе паганялам «Сялуха».
«Засунем глыбей галаву ў пясок, а язык у сраку. І дазволім сялусе [імя з маленькай літары і закрэслена — НН] куратарам прапагандыстаў ЛГБТ разбэшчваць нашых дзяцей…» — напісала Бондарава ў сярэдзіне лютага.
Не атрымаўшы па руках за такую дзёрзкасць, даносчыца працягнула. За апошнія дні з'явіліся адразу два допісы, у якіх нявестка Лукашэнкі згадваецца як «Сялуха».
У адным яна накінулася на спявачку Анжылішу за тое, што тая быццам бы прапагандуе наркотыкі. Допіс Бондарава падпісала так: «Сілавікам рэспект. Сялусе ганьба».
У другім запатрабавала ад «бухгалтараў ГУБАЗіКа» вывучыць фінансавыя патокі маладых блогераў, западозрыўшы махлярства пад выглядам дабрачыннасці.
«Калі думаеш, што дно прабіта, але знізу пастукалі ашуканцы з сялухаўскай «крышай». Фубля!», — дадала даносчыца ў канцы.
Мяркуючы па асаблівасцях напісання мянушкі, якую Бондарава прыдумала для Ганны Лукашэнка, даносчыца зрыфмавала яе творчы псеўданім з беларускім сялом.
Суфікс -ух (-юх) паказвае на прыналежнасць слова да размоўнага стылю, як у словах свякруха, галадуха, бытавуха, весялуха, але тым жа суфіксам у прастамоўі маркіруюцца і словы з адценнем грубасці ці пагарды, з адмоўнай экспрэсіяй — патаскуха, сяруха.
У чэрвені 2024 года даносчыца ўжо публічна выбачалася на сваім канале за тое, што назвала Ганну Сялук, пра чыю сапраўдную асобу яна нібыта не ведала, змагаркай. «Я памылілася, гэта няпраўда. Інфармацыю заўсёды трэба правяраць», — напісала тады Бондарава. Верагодна, хутка ёй давядзецца выбачацца зноў.
«Наша Нiва» — бастыён беларушчыны
ПАДТРЫМАЦЬ
Топавы перакладчык паехаў у Беларусь мяняць пашпарт — і сеў за данаты. «КДБ паглядзеў на суму і вырашыў, што ніхто ў здаровым розуме не можа выдаткаваць столькі ўласных грошай»1313
Каментары