У Расіі група вайскоўцаў адмаўляецца ваяваць ва Украіне. Іх адпраўляюць на фронт сілком
Больш за 100 вайскоўцаў расійскай арміі, якія адмовіліся ваяваць, 28 лютага гвалтоўна пасадзілі ў аўтобусы і даставілі з вайсковай камендатуры ў Чабаркулі Чалябінскай вобласці ў Екацярынбург, піша Astra. Там мужчын размясцілі ў палатачным гарадку за 20 кіламетраў ад мясцовага аэрапорта «Кальцова».
Мужчыны запатрабавалі даць ім магчымасць напісаць рапарты аб адмове працягваць службу і спрабавалі выклікаць на месца следчых. Замест гэтага іх паспрабавалі сілком пасадзіць у самалёт, каб адправіць у Растоў-на-Доне, а затым ва Украіну, але вайскоўцы «зладзілі бунт». Пра гэта Astra расказалі адзін з вайскоўцаў, маці іншага вайскоўца, яго сябар і сяброўка, а таксама вайскоўцы на відэа, якія ёсць у распараджэнні Astra.
На відэа чутныя крыкі і лаянка вайскоўцаў з вайсковай паліцыяй, хтосьці з вайскоўцаў прапануе «ўскрываць вены» і патрабуе выклікаць хуткую. Кадры запісаныя 28 лютага.
Мужчыны, якіх гвалтоўна спрабавалі адправіць на вайну, належаць да розных вайсковых часцей. Яны былі дастаўленыя ў Чабаркуль на час папярэдняга следства і суда, як «вайскоўцы, у дзеяннях якіх угледжваюцца прыкметы злачынства, прадугледжанага арт. 337 КК РФ «Самавольнае пакіданне часткі)», вынікае з выпіскі з загаду начальніка Чабаркульского мясцовага гарнізона, якая ёсць у распараджэнні Astra.
Сярод іх ёсць як мабілізаваныя, так і добраахвотнікі. Многія перасоўваюцца на мыліцах або маюць іншыя праблемы са здароўем.
«Мы просім, каб нас асудзілі, але ніхто не дае такой магчымасці нам. […] Мы просім нас падтрымаць, мы не хочам проста паміраць. У кагосьці дзеці, у нас інваліды тут, усе параненыя, хворыя. […] Гэта «беспредел», — заяўлялі вайскоўцы на відэа, якое было запісана ўвечары 28 лютага.
28 лютага а 23-й гадзіне па екацярынбургскім часе на запланаваны рэйс да Растова-на-Доне мужчын пасадзіць так і не змаглі, яны зніклі з сувязі. 1 сакавіка да абеду вайскоўцы выйшлі на сувязь і паведамілі, што раніцай іх гвалтоўна пасадзілі ў самалёт да Растова, а затым у аўтобусы да Луганска.
«Вайсковая паліцыя, іх было штук з 20 чалавек, усе ўзброеныя — прымусілі пайсці на борт. Падманулі, сказалі, што на борце самалёта стаяць афіцэры і можна будзе з імі пагаварыць, але ў выніку там нікога не было. Цяпер ужо мы прыляцелі ў Растоў і нас на аўтобусах вязуць у Луганск. Нават не далі вады. Не дазваляюць заехаць у краму, нас каля 150 чалавек. Мы другія суткі не елі.
Тэлефоны пакуль што не забіраюць, паглядзім што далей будзе. Сказалі, там можна будзе напісаць рапарт на адмову ад вайсковай службы. І на месцы нібыта будуць следчыя. Многія згодныя пісаць адмову. Лепш ехаць у турму», — сказаў Astra адзін з вайскоўцаў.
Цяпер чытаюць
Колькасць судоў па палітычных крыміналках зменшылася ў разы19
Каментары