Згодна з данымі oryxspioenkop, задакументавана страта расіянамі 1845 танкаў. Як хутка і якім чынам агрэсары змогуць аднавіць свой танкавы патэнцыял ва ўмовах санкцый?
Як паведамляе Міжнародны інстытут стратэгічных даследаванняў, на сёння ўкраінцы знішчылі каля паловы даваеннага парку танкаў Т-72, якіх налічвалася каля 2000 адзінак, што складала асноўную частку расійскіх танкавых сіл.
У гады Другой сусветнай вайны савецкія заводы маглі выпускаць больш за 1000 танкаў штомесяц, бо многія трактарныя і чыгуначныя заводы былі пераведзеныя на вайсковыя рэйкі. Сёння пракруціць такі трук будзе значна цяжэй з-за складанасці электронікі, што выкарыстоўваецца ў сучасных машынах для начнога бачання, навядзення і мноства іншых функцый.
Як паведамляе выданне The Economist, сёння ў Расіі застаўся толькі адзін завод па вырабе танкаў — вялізны «Уралвагонзавод», пабудаваны яшчэ ў 1930-я гады. Аднак безгаспадарлівасць і велізарныя даўгі запаволілі мадэрнізацыю завода. Рабочыя жартуюць, што збіраюць танкі ўручную. Расійская «Новая газета» паведамляла, што завод вырабляе толькі 20 танкаў за месяц. Натуральна, задаволіць вялізны попыт, які перавышае прапанову ў шмат разоў, такой колькасцю немагчыма.
Менавіта таму паскорыліся тэмпы раскансервацыі старых танкаў, якіх у Расіі могуць захоўвацца тысячы. Сёння ва Украіне сучасныя расійскія Т-90 ваююць разам з вялікай колькасцю быццам бы мадэрнізаваных Т-72B3S, пабудаваных дзесяцігоддзі таму. Нават з «паляпшэннямі» старыя танкі саступаюць новым мадэлям і з меншай верагоднасцю выжываюць пасля ўдараў украінскіх сіл — тым не менш старыя машыны ўсё яшчэ карысныя.
Згодна з паведамленнямі расійскіх медыя, «Уралвагонзавод» аднаўляе каля васьмі танкаў за месяц, а тры іншыя заводы па рамонце бранятэхнікі аднаўляюць прыкладна па 17. Таксама паведамляецца пра быццам бы яшчэ два заводы, якія павінны быць уведзеныя ў эксплуатацыю ў найбліжэйшыя некалькі месяцаў.
Такім чынам, хоць Расія і можа вырабляць толькі 20 новых танкаў у месяц, неўзабаве яна зможа аднаўляць каля 90 састарэлых адзінак. Тым не менш, паводле аналізу Oryx, гэта не кампенсуе меркаваных страт у 150 адзінак штомесяц. А вытворчасць можа быць абцяжараная дэфіцытам высокатэхналагічных дэталяў. Так, Еўракамісія сцвярджае, што Расія выкарыстоўвае ў вайсковай тэхніцы чыпы з імпартных пасудамыек і халадзільнікаў.
Украіне і яе саюзнікам таксама бракуе магчымасці хутка вырабляць танкі. Адзіны ва Украіне танкавы завод пад Харкавам быў разбураны бамбёжкамі яшчэ ў пачатку вайны. ЗША, якія паабяцалі адправіць ва Украіну 31 танк M1A2 Abrams, маюць адзін завод, які можа вырабляць 15 танкаў штомесяц. Вытворчасць у іншых краінах Захаду ідзе гэтак жа павольна, што таксама прыводзіць да неабходнасці пошуку старых танкаў для дапамогі ўкраінскім абаронцам.
Цяпер чытаюць
Як у галечы співалася радня Лукашэнкі? Малавядомыя факты48
Каментары