Жыхара Пінска асудзілі за абразы прадстаўнікоў улады і па «наркатычным» артыкуле
У судзе Пінскага раёна і горада Пінска 10 красавіка ў закрытым рэжыме вынесены прысуд 40-гадоваму Алегу Стасюку. Судовы працэс вёў суддзя Ігар Клімовіч, дзяржабвінаваўца — Ілля Гузарэвіч, піша «Вясна».
На судзе Стасюк быў пад вартай. Вядома, што ў мужчыны двое непаўналетніх дзяцей.
Мужчыну судзілі за інтэрнэт-каментарыі. Аднак, калі да Стасюка прыйшлі з ператрусам, дома ў яго знайшлі «абсталяванне для вырошчвання» канопляў, марыхуану, расліны канопляў. Акрамя таго, на камп'ютары знайшлі порна, на якім Стасюк, па меркаванні следства «незаконна зарабіў не менш за 775$».
А каментарыі ў сацыяльных сетках Алег Стасюк нібыта напісаў у тэлеграме ў маі 2021 года і сакавіку 2022 года. Яны тычыліся генпракурора Шведа, кіраўніка КДК, міністра інфармацыі, дырэктара і намесніка дырэктара ДФР.
Такім чынам, Стасюку выставілі абвінавачанні па чатырох крымінальных артыкулах: арт. 369 КК (абраза прадстаўніка ўлады), ч. 2 арт. 343 КК (выраб і распаўсюджванне парнаграфічных матэрыялаў), ч. 1 арт. 329 КК (незаконныя пасеў і (або) вырошчванне раслін альбо грыбоў, якія змяшчаюць наркатычныя сродкі або псіхатропныя рэчывы), ч. 1 арт. 328 КК (незаконны абарот наркатычных сродкаў, псіхатропных рэчываў, іх прэкурсораў і аналагаў).
Сумарна па ўсіх артыкулах, шляхам частковага складання злачынстваў, Стасюку прысудзілі чатыры гады калоніі ва ўмовах агульнага рэжыму і штраф у памеры 200 базавых велічынь (7400 рублёў).
Пачынаюць судзіць выкладчыка Дзмітрыя Юртаева. Яго прымушалі на камеру чытаць вершы
Рамана Пратасевіча на судзе абвінавацілі ў кіраванні яшчэ адным «экстрэмісцкім фармаваннем»
Каментары