У Вашынгтоне лічаць, што за атакай беспілотнікаў на Крэмль, якая адбылася ў пачатку мая, можа стаяць Украіна, піша New York Times са спасылкай на крыніцы ў Белым доме. Такія высновы амерыканская разведка зрабіла на аснове перахопаў паведамленняў расійскага і ўкраінскага бакоў.
Першапачаткова некаторыя амерыканскія чыноўнікі разглядалі атаку на Крэмль як інсцэніроўку Масквы, закліканую прывесці да эскалацыі канфлікту. Аднак потым ЗША перахапілі паведамленні, у якіх расійскія афіцыйныя асобы абмяркоўвалі інцыдэнт і вынікі папярэдняга расследавання. Як выявілася, расійскія ўлады былі здзіўлены атакай беспілотніка і вінавацілі ў тым, што адбылося, Украіну, піша Бі-бі-сі.
Аналагічным чынам высветлілася, што некаторыя ўкраінскія чыноўнікі схільныя лічыць атаку на Крэмль справай рук іх краіны, піша NYT.
Крыніцы ў ЗША падкрэсліваюць, што высновы амерыканскай разведкі — толькі здагадка. Дастатковых звестак аб дачыненні Украіны няма.
Выданне нагадвае, што ЗША — найбуйнейшы ў свеце пастаўшчык узбраенняў Украіне і падобныя інцыдэнты вельмі турбуюць адміністрацыю Джо Байдэна. У Белым доме асцерагаюцца, што яны могуць даць Расіі нагоду распаўсюдзіць вайну за межы Украіны.
Цяпер ЗША таксама вывучаюць абставіны ўварвання праўкраінскіх дыверсійных груп у Белгарадскую вобласць, што адбылося на гэтым тыдні.
Амерыканскія чыноўнікі лічаць, што гэта таксама магло быць акцыяй, спланаванай у Кіеве, нягледзячы на тое, што адказнасць за яе ўзялі на сябе добраахвотніцкія групоўкі.
Таксама ў ЗША дапускаюць, што Украіна датычная да забойства Дар'і Дугінай — дачкі расійскага ідэолага вайны Аляксандра Дугіна, якую ўзарвалі ў аўтамабілі ў жніўні мінулага года, як піша NYT.
Украінскія ўлады афіцыйна не бралі на сябе адказнасць за гэтыя атакі.
У чатах Калінкавічаў распаўсюджваецца ВІДЭА, якое зафіксавала падзенне беспілотніка1
Каментары