У Брэсце п'яная жанчына пагражала пасажырам грамадскага транспарту нажом
У Брэсце п'яная 54-гадовая жанчына навяла страху ў грамадскім транспарце. Цяпер яе будуць судзіць, а пакаранне пагражае вельмі сур'ёзнае, пішуць «Мінск-Навіны».
У пачатку 2025 года жанчына села ў тралейбус у стане моцнага алкагольнага ап'янення. Спачатку яна проста паводзіла сябе неадэкватна — гаварыла сама з сабой, а пасля дастала кухонны нож і пачала пагражаць пасажырам, у тым ліку дзецям, крычучы, што «ўсіх заб'е».
Пазней яна перасела ў аўтобус і там паўтарыла тое ж самае — махала нажом і палохала людзей. Прысутныя выклікалі міліцыю.
Падчас допыту жанчына сцвярджала, што нічога не памятае з-за ап'янення. Адышла яна толькі ў псіханеўралагічным дыспансеры. Але, паводле закона, алкаголь не з'яўляецца змякчальнай віну акалічнасцю, а наадварот — абцяжарвае адказнасць.
Следчы камітэт выставіў жанчыне абвінавачанне па артыкуле аб асабліва злосным хуліганстве, за што ёй пагражае да 10 гадоў пазбаўлення волі. Таксама стала вядома, што жанчына ўжо неаднаразова прыцягвалася да крымінальнай адказнасці, не працуе і пазбаўленая бацькоўскіх правоў з-за хранічнага алкагалізму.
Каментары