Вы дакладна бачылі фільмы, якія пачыналіся з гэтай застаўкі. Іх здымае кінакампанія, якую заснаваў ураджэнец Беларусі
Кінакампанія Metro-Goldwyn-Mayer многім вядомая па льве на застаўцы. Яна была створаная ў 1924 годзе. Заснавальнікаў было двое: першы — Маркус Лоў, а другі — Луіс Барт Маер, які нарадзіўся ў Мінску ў габрэйскай сям’і. Нягледзячы на тое, што ён быў тагачасным селебрыціз, жыццё прадзюсара было ахутанае таямніцай.
Лазар Якаўлевіч Меір (так яго звалі пры нараджэнні) з’явіўся на свет ці то 4-га, ці то 12-га ліпеня 1884 або 1885 года. Ёсць таксама версія, што Лазар Меір нарадзіўся папраўдзе пад Кіевам.
У першыя гады жыцця Лазара ў Расійскай імперыі ўчасціліся габрэйскія пагромы. Гэта стала адной з прычын, чаму сям’я Лазара пераехала ў ЗША, а потым у Канаду. Тады малому было каля двух гадоў.
У Канадзе сям’я цяпер ужо Луіса жыла нябедна. Больш за тое, сам хлопец пазней ажэніцца з дзяўчынай з багатай сям’і. Гэта дапаможа яму пачаць бізнэс: Луіс Маер пачне адкрываць кінатэатры і скора створыць найбуйнейшую сетку ў Новай Англіі. У 1914 годзе ён адкрые ўласную кінакампанію — ALCO.
Праз 10 гадоў нью-ёркскі мільянер Маркус Лоў купіць кантрольныя пакеты акцый трох вядомых кінакампаній, у тым ліку і Маера, каб аб’яднаць іх у карпарацыю — Metro-Goldwyn-Mayer, або проста MGM. Самога Луіса мільянер Лоў зробіць віцэ-прэзідэнтам кінастудыі з неабмежаванымі паўнамоцтвамі.
На працягу наступных 27 гадоў пад кіраўніцтвам ураджэнца Беларусі MGM будзе адной з самых буйных і паспяховых студый па вытворчасці поўнаметражных фільмаў. А эмблема фірмы — выява льва, што рыкае ў арэоле з кінастужкі, — стане вядомая аматарам кіно ва ўсім свеце.
Больш цікавых відэа шукайце ў тыктоку «Нашай Нівы».
Цяпер чытаюць
ЗША перадалі Лукашэнку найноўшыя амерыканскія лекі для пахудзення18
Каментары