Стваральнікі навігатара па беларускіх аўдыякнігах Audiobooks.by расказалі «Нашай Ніве», якія творы, запісаныя іхняй камандай, карыстаюцца найбольшай папулярнасцю сярод слухачоў.
На сайце ёсць аўдыякнігі па творах класікаў, сучасных аўтараў, а таксама аўдыякнігі для дзяцей. Сярод кніг, агучаных самім праектам, па праслухоўванні з вялікім адрывам лідзіруюць дзве.
Першае месца, што было чакана, займае папулярны твор Уладзіміра Караткевіча — прыгодніцкая аповесць «Дзікае паляванне караля Стаха».
Галоўны герой выпадкова становіцца сведкам злавеснага прывіду дзікага палявання з далёкага мінулага, які трымае ў страху людзей.
Аповесць, агучаная купалаўцам Алегам Гарбузам, даступная бясплатна.
За ім следам ідзе «Апошняя кніга пана А.» Альгерда Бахарэвіча. Яна складаецца з 30 казак, якія распавядае купцу-выдаўцу пісьменнік, што трапіў у доўг. Кніга была выдадзена ў рэвалюцыйным 2020 годзе і ўжо сёлета ўнесена рэжымам Лукашэнкі ў спіс экстрэмісцкіх матэрыялаў.
Трэцяй па папулярнасці стала кніга «Мая школа» Ганны Севярынец, у якой аповед вядзецца ад імя «русіцы» з сярэдняй школы ў выдуманым горадзе.
Аўдыякнігу агучыла сама аўтарка пры падтрымцы беларускіх супрацоўнікаў кампаніі Google.
Чацвёртае месца нечакана, як прызнаюцца самі стваральнікі сайта, у зборніка апавяданняў, які выдадзены яшчэ ў 2008 годзе. Гэта «Шлях дробнай сволачы», у якой Ева Вежнавец вывела галерэю нетыповых моцных гераінь, якія спрабуюць выжыць у краіне «дробнай сволачы» і гатовыя на выпрабаванні. Магчыма, у топы кніга паднялася праз вялікі поспех апошняга выдадзенага твора аўтаркі — аповесці «Па што ідзеш, воўча?».
На пятым месцы размясціўся самы вядомы твор Мендэле Мойхер-Сфорыма, яўрэйскага аўтара з Капыля, — сатырычны раман «Падарожжы Беньяміна ІІІ» у перакладзе Паўла Касцюкевіча. Раман, выдадзены яшчэ ў 1878 годзе, распавядае пра жыхароў беларускага мястэчка, якія выправіліся ў фантастычныя краіны Усходу.
Завяршае падборку найбольш папулярных беларускіх аўдыякніг аповесць «Танцы над горадам» Уладзіміра Арлова, за якую аўтар атрымаў Літаратурную прэмію Ежы Гедройця. Героі аповесці — самнамбулы, якія ўдзень не знаёмыя паміж сабой, а ўначы ўтвараюць таемнае брацтва.
«Падарожжы Беньяміна ІІІ» і «Танцы над горадам» таксама даступныя для праслухоўвання бясплатна.
А вось з платнымі кнігамі склалася дзіўная сітуацыя: Беларусь у гэтым спісе займае толькі шостае месца, саступаючы па продажы беларускіх аўдыякніг Польшчы, ЗША і нават Расіі.
Гэта тлумачыцца ў першую чаргу недаступнасцю ў краіне такіх шырокавядомых платных сэрвісаў, як Google Play Books, Spotify, Apple. Сёння з Беларусі кнігі можна набываць толькі праз адзін сэрвіс — Kobo, але, па-першае, не кожны захоча ставіць яшчэ адну лішнюю праграму на тэлефон, а па-другое, плаціць за некаторыя творы, прызнаныя экстрэмісцкімі, папросту небяспечна. Да таго ж у пачатку гэтага года Міністэрства інфармацыі абмежавала доступ да сайта з Беларусі.
На гэты момант на сайце сабраныя спасылкі на 523 кнігі з сайтаў «Кніжны Воз», «Беларуская палічка», «Камунікат», «Радыё Свабода», «Беларускі ПЭН-цэнтр», «Мінінфарм Рэспублікі Беларусь», а таксама ва ўласным агучванні, таму кожны зможа знайсці нешта на свой густ.
«Наша Нiва» — бастыён беларушчыны
ПАДТРЫМАЦЬЦяпер чытаюць
Аляксандр Лукашэнка так ляснуўся на лёд на хакеі, што трыбуны замерлі ВІДЭА101
Аляксандр Лукашэнка так ляснуўся на лёд на хакеі, што трыбуны замерлі ВІДЭА
«Па-беларуску «Слана» Філіпенкі набывалі больш ахвотна, чым па-руску». Якія кнігі сёння ў топе? Інтэрв'ю з кіраўніцай выдавецтва Gutenberg Publisher55
Каментары