Казус у Варшаве. Ахоўнікаў прэзідэнта ПАР не прапусціла ахова ў аэрапорце. Тыя заявілі пра расізм
Польскія памежнікі затрымалі ў аэрапорце Варшавы самалёт з ахоўнікамі прэзідэнта ПАР, які прыляцеў у Еўропу на перамовы з лідарамі Украіны і Расіі. Начальнік прэзідэнцкай аховы абвінаваціў палякаў у расізме, але тыя запярэчылі, што ў гасцей проста не было дакументаў на частку зброі.
Самалёт з прэзідэнцкай аховай і журналістамі быў затрыманы ў Варшаве ў чацвер, і першыя 24 гадзіны польскія памежнікі нікога з яго не выпускалі, піша Бі-бі-сі.
Затым частцы пасажыраў дазволілі выйсці ў горад і пасяліцца ў гатэлях, але самалёт і багаж, як абвясціла прэс-служба аэрапорта, будуць затрыманыя да нядзелі.
Прэзідэнт ПАР Сірыл Рамафоса прыляцеў у Еўропу ў складзе дэлегацыі афрыканскіх лідараў, якая хоча паспрабаваць схіліць прэзідэнтаў Расіі і Украіны да мірных перамоў. У чацвер дэлегацыя сустракалася з прэзідэнтам Польшчы Анджэем Дудам, у пятніцу наведала Кіеў, а ў суботу плануе сустрэчу з Пуціным у Санкт-Пецярбургу.
Начальнік аховы Рамафоса генерал-маёр Уолі Раадэ быў вельмі абураны тым, што яго бос застаўся без часткі целаахоўнікаў.
«Яны нас затрымліваюць, яны падвяргаюць жыццё нашага прэзідэнта небяспецы! Мы ўжо павінны былі быць у Кіеве, а яны вунь што робяць! Я хачу, каб вы бачылі, якія яны тут расісты!» — заявіў генерал.
Прэс-сакратар міністра-каардынатара спецслужбаў Польшчы Станіслаў Жарын назваў абвінавачанні ў расізме лухтой і патлумачыў, што ў паўднёваафрыканскіх целаахоўнікаў былі не ў парадку дакументы на зброю.
З такім жа тлумачэннем выступілі і памежнікі.
«У чальцоў дэлегацыі была зброя, на ўвоз якой не было дазволу. Але самі яны мелі магчымасць выйсці з самалёта», — напісала памежнае ведамства Польшчы ў твітары.
Прэс-сакратар прэзідэнта ПАР Вінсент Магвенья сказаў, што іх дэлегацыя спрабуе дамовіцца, каб пасажыры затрыманага чартарнага рэйса патрапілі хоць бы на Санкт-Пецярбургскую частку турнэ прэзідэнтаў.
Нягледзячы на тое, што ахоўнікі прэзідэнта Рамафоса затрымаліся ў Варшаве, сам ён разам з іншымі прэзідэнтамі прыехаў у пятніцу ў Кіеў. Вінсент Магвенья запэўніў у твітары, што яго бяспека была цалкам гарантаваная.
У афрыканскую дэлегацыю, акрамя Рамафоса, уваходзяць прэзідэнты Сенегала, Замбіі і Каморскіх Астравоў, а таксама прадстаўнікі Егіпта, Рэспублікі Конга (Бразавіль) і Уганды.
У той час, калі яны знаходзіліся ў Кіеве, Расія нанесла па горадзе і ваколіцах чарговы ракетны ўдар.
Каментары