Суд у Растове асудзіў двух украінцаў да 23 і 24 гадоў калоніі па справе аб замаху на прызначанага Расіяй намесніка кіраўніка Херсонскай вобласці
Паўднёвы акруговы вайсковы суд у Растове-на-Доне асудзіў грамадзян Украіны Юрыя Даманчука і Віталя Скакуна да 23 і 24 гадоў калоніі строгага рэжыму паводле абвінавачання ў замаху на прызначанага Расіяй «віцэ-губернатара» Херсонскай вобласці Віталя Булюка.
Згодна з карткай справы на сайце суда, Скакуна і Даманчука прызналі вінаватымі па артыкулах аб учыненні тэракта, а таксама ў незаконным абароце агнястрэльнай зброі і выбуховых рэчываў. Дзяржабвінавачанне прасіла прызначыць абодвум пажыццёвае зняволенне, як паведамляе «Дождь».
У снежні 2022 года прызначаныя Расіяй «улады» Херсонскай вобласці паведамілі аб падрыве машыны Булюка ў Скадоўску, у выніку якога чыноўнік атрымаў асколачныя раненні, а кіроўца аўтамабіля загінуў.
Паводле версіі следства, Скакун і Даманчук незаконна набылі выбухоўку і пісталеты Макарава ў Скадоўску. Пасля гэтага па ўказанні СБУ яны некалькі месяцаў рыхтавалі тэракт. Паводле звестак расійскіх сілавікоў, Скакун усталяваў міну каля дома Булюка і прывёў яе ў дзеянне, калі той накіраваўся да аўто.
Цяпер чытаюць
23‑гадовы ахоўнік з Астраўца загінуў за Расію на вайне. Паваяваў ён, відаць, каля месяца16
Каментары