У Мінску з'явіліся рачныя трамваі. Дзе і як на іх можна пракаціцца
Трамваі «Сябры» і «Флібусцьер» разлічаныя на 30 месцаў.
На двух рачных трамваях расійскай вытворчасці ўжо можна пракаціцца па вадасховішчы Дразды, пішуць «Мінск-Навіны».
Рачныя трамваі «Сябры» і «Флібусцьер», разлічаныя кожны на 30 месцаў, знаходзяцца на набярэжнай на скрыжаванні вуліцы Ратамскай і пр. Пераможцаў (прыпынак «Ржавец», калі дабірацца на аўтобусе №119с і маршрутцы №1119).
Дырэктар кампаніі ТАА «Супрым-Ф1» Васіль Дзегцяроў расказвае перадгісторыю трамваяў.
Першы вырашылі назваць «Сябры» — сімвал аб'яднання. У нашай фірме некалькі заснавальнікаў, якія развіваюць не толькі адпачынак на вадзе, але і актыўны адпачынак у цэлым. Другі рачны трамвай — «Флібусцьер» — марскі злодзей XVII стагоддзя. Яго мы плануем перамясціць у парк Горкага і стварыць інтэрактыўную зону з піратам і папугаем.
Васіль Дзегцяроў таксама расказвае, што гараджане і госці сталіцы выбіраюць як актыўны від адпачынку, так і пасіўны, назавём «вытанчаны» (цеплаход, катамараны). Карыстаюцца папулярнасцю розныя турпаходы на байдарках, ёга на sup-бордах, сілавыя віды фітнэсу на іх. Сем'і гадзінамі плаваюць на шлюпках па вадасховішчы Дразды. Праўда, складана чымсьці здзівіць, але стараемся! Таксама плануецца парадаваць гараджан воднымі лыжамі і электрычным сапсёрфінгам.
Дарослы білет на рачны трамвай каштуе 10 рублёў, дзіцячы — 5. Ёсць выратавальныя камізэлькі. Прагулка доўжыцца 25 хвілін.
Каментары