Кроксы ад «Марка», мартэнсы ад «Праменя». Шукаем стыльны абутак беларускіх вытворцаў
Мы знайшлі модныя пары, якімі варта дапоўніць восеньскія лукі.
Як і большасць прадпрыемстваў беларускай лёгкай прамысловасці, вытворцы абутку не спяшаюцца гнацца за трэндамі. Шматлікія мадэлі распрацаваныя дзесяцігоддзі таму, а якасць пашыву пакідае жадаць лепшага. Але з соцень неактуальных пар, вырабленых на айчынных прадпрыемствах, мы знайшлі некалькі па-сапраўднаму модных варыянтаў.
Belwest: унісэкс і кеды
Рэчы «ўнісэкс», якія пасуюць для абодвух палоў, трывала ўвайшлі ў моду ў пачатку 1960-х. У той час пачалі пераглядацца стэрэатыпныя гендарныя ролі, у тым ліку пераасэнсоўвалася і становішча жанчыны ў грамадстве. У знак падтрымкі новай плыні дзяўчаты мянялі сукенкі на мужчынскія штаны, а абцасы — на зручныя боты. З часам да трэнду далучыліся мужчыны: так у сучасны мужчынскі гардэроб увайшлі лёгкія тканіны, далікатныя колеры і карункі. Апошнія для аднаго са сваіх вобразаў абраў нават музыка Лявон Вольскі.
У Belwest таксама ёсць некалькі гендарна-нейтральных мадэляў. Напрыклад, чаравікі ў стылі мілітары. Каштуюць такія пары каля 130 даляраў, а знайсці іх можна ў жаночым аддзеле.
Аматаркам стылю Old Money можна прыгледзецца да белых класічных кедаў. Мадэль доўга будзе заставацца актуальнай і выдатна ўпішацца ў базавы гардэроб.
Брэнд не абышоў увагай мужчын: ім прапануюць спартыўныя чаравікі з настроем «Алімпіяды-80». Такія вырабляюцца ў двух колерах — чорным і балотна-зялёным. Насіць пару можна як са спартовымі лукамі, так і дапаўняць імі класічныя камплекты.
Кроксы ад Marko
Віцебскі брэнд уразіў наяўнасцю гумавых тапак мадэлі «Крокс». Пара ад Marko мала чым адрозніваецца ад арыгінала: крыху змененыя памеры дзірак і сам лагатып. Зрэшты, розніца бачная толькі ў цане: арыгінал каштуе каля 50 даляраў, беларуская копія — 7.
У восеньскай калекцыі можна вылучыць жаночыя батыльёны на ўстойлівым абцасе. Такія будуць добра глядзецца ў спалучэнні з лёгкімі і карункавымі сукенкамі і паліто-аверсайз. Абыдзецца пара ў 93 даляры.
У мужчынскай секцыі нашу ўвагу прыцягнулі чаравікі з нубуку. Яны не маюць яркага дызайну, затое могуць стаць нядрэннай класічнай базай на восень. Дарэчы, каштуюць такія танней за жаночыя — усяго 73 даляры ЗША.
Лідскі абутак: пары для крэатыўных
Прагулка па краме «Лідскі абутак» падобная да экскурсіі ў мінулае: столькі састарэлых мадэляў можна знайсці хіба што ў касцюмернай «Беларусьфільма». Напрыклад, гэтыя выдатныя туфлі за 11 даляраў нагадваюць пасляваенныя мадэлі — з грубай бавоўны і са слабым супінатарам.
Дызайнеры прадпрыемства паспрабавалі ажывіць і мадэль пачатку 60-х, расфарбаваўшы яе ў змяіны прынт. Каштуюць крэатыўныя туфлі 22 даляры, а знайсці іх можна ў мужчынскім аддзеле.
«Лідскі абутак» знакаміты сваімі кедамі. Такія мадэлі з'яўляюцца несмяротнай класікай, таму на іх не шкада выдаткаваць грошы. Варта адзначыць расфарбоўку кедаў: яны вырабляюцца ў трэндавых колерах і ні ў чым не саступаюць заходнім аналагам. Каштуе спартовая пара ўсяго 21 даляр.
«Прамень», ці Dr. Martens па-беларуску
Мінская марка парадавала разнастайнасцю стыльнага абутку. У жаночым аддзеле мы заўважылі цікавыя туфлі на нізкім ходзе. Эклектычны абутак спалучае брутальнасць і элементы «бэбі-дол», а форма іх наска — трэнд наступнага сезона.
Другая пара — замшавыя лоферы, яны выдатна падыдуць на сухую восень: іх можна спалучаць як з джынсамі і штанамі, так і з сукенкамі.
Аналаг знакамітых чаравікаў Dr. Martens таксама з'явіўся ў «Праменя». Мадэлі выкананыя са скуры і замшы і маюць шырокую каляровую палітру. На жаль, на сайце кампаніі не пазначаны цэны, але, мяркуем, яны будуць не вышэйшыя за цану арыгінала.
Цяпер чытаюць
«Беларусь яны бачаць часткай Расіі». Што значыць уздым «Альтэрнатывы для Германіі», наколькі далёка гэта можа зайсці і як сябе пазіцыянаваць беларусам4444
Каментары
(ружжовыя на абцассе)