Больш не будуць праводзіць літаратурны фестываль у гонар Ніны Мацяш
У літаратурных колах Берасцейшчыны абмяркоўваецца навіна, што літаратурна-песенны фестываль у Белаазёрску «Бабіна лета з Нінай Мацяш», які штогод збіраў прыхільнікаў творчасці паэткі з усёй Беларусі, а таксама творцаў-сяброў Ніны Язэпаўны, больш праводзіцца не будзе, піша Bellit.info.
Фестываль быў заснаваны ў 2010 годзе і традыцыйна праходзіў у Доме культуры Белаазёрска, з удзелам мясцовых уладаў, прадстаўнікоў школ і бібліятэк горада.
На паэтычныя чытанні штогод адмыслова прыязджалі літаратары з Берасця і раённых цэнтраў вобласці, а таксама паэты і перакладчыкі з Мінска, Гродна. На «Бабіным леце» выступалі Раіса Баравікова, Анатоль Вярцінскі, Алесь Каско, Алесь Разанаў, Міхась Скобла і дзясяткі іншых паэтаў і пісьменнікаў.
«Бабіна лета з Нінай Мацяш» традыцыйна праводзілася ў дзень яе нараджэння, 20 верасня. Акурат сёлета паэтка святкавала б сваё 80-годдзе.
Ніна Мацяш (1943 — 2008) — паэтка, перакладчыца. Скончыла Бярозаўскую сярэднюю школу (1960), паступіла на факультэт французскай мовы Мінскага дзяржаўнага педагагічнага інстытута замежных моў. З-за хваробы вымушана была ўзяць акадэмічны адпачынак (скончыла інстытут у 1966), пасля жыла ў Белаазёрску. Аўтарка шматлікіх зборнікаў паэзіі, якія атрымлівалі добрыя водгукі крытыкаў.
Таксама перакладала з нямецкай, польскай, французскай моў. У яе перакладзе выйшлі кніжкі Жоржа Сіменона «Першая справа Мегрэ», Антуана дэ Сент-Экзюперы «Планета людзей» і «Маленькі прынц», навелы Гі дэ Мапасана, паэма «Маруся Чурай» Ліны Кастэнка і іншыя.
Цяпер чытаюць
Начальнік крымінальнага вышуку МУС бачыў прагулачны дворык СІЗА КДБ з акна свайго кабінета, а потым сам стаў вязнем3
Каментары