«Вам прыйдзецца вучыцца». Лукашэнка параўнаў беларускую дыктатуру з амерыканскай дэмакратыяй
У інтэрв’ю тэлеканалу Russia Today Аляксандр Лукашэнка параўнаў беларускую дыктатуру з амерыканскай дэмакратыяй. Параўнанне выйшла не на карысць ЗША, бо сапраўдная дэмакратыя, на яго думку, якраз у Беларусі.
Як лічыць Лукашэнка, нягледзячы на тое, што ў ЗША рэгулярна мяняюцца прэзідэнты, агульная палітыка краіны істотна не змяняецца. У той жа час у Беларусі, маўляў, назіраецца стабільнае развіццё на працягу многіх гадоў, а ўлада карыстаецца падтрымкай насельніцтва.
Прапагандыст RT Рык Санчэс у размове паставіў пытанне, ці сапраўды ЗША можна лічыць узорам дэмакратыі, калі многія праблемы застаюцца нязменнымі, а Беларусь — дыктатурай.
Лукашэнка ў адказ заявіў, што, на яго думку, заходняя рыторыка пра дэмакратыю і правы чалавека часта не адпавядае рэчаіснасці. Ён абвінаваціў ЗША ў ваенных дзеяннях у розных рэгіёнах свету і сцвярджаў, што ў выніку такіх аперацый гінуць мірныя людзі, у тым ліку дзеці. У якасці прыкладу ён прывёў паведамленні пра гібель людзей падчас удараў на Блізкім Усходзе:
«Вы гатовыя бамбіць, ламаць, крышыць, нягледзячы ні на якія правы чалавека — гэта аснова дыктатуры».
На гэтай падставе ён сказаў, што галоўнае права чалавека — гэта права на жыццё, і калі яно парушаецца, то размовы пра дэмакратыю, маўляў, губляюць сэнс.
Таксама ён выказаў думку, што ЗША дзейнічаюць зыходзячы з уласных інтарэсаў, у тым ліку эканамічных і энергетычных, а не з прынцыпаў дэмакратыі. І дадаў, што ўнутры саміх ЗША, на яго думку, таксама ёсць праблемы з рэальнай дэмакратыяй.
Менавіта таму, маўляў, Беларусь мае больш «рэальнай дэмакратыі» і правоў чалавека, чым у ЗША:
«У нас — я пра гэта даўно казаў — дэмакратыі вам прыйдзецца вучыцца. У нас у сто разоў гэтай дэмакратыі больш, чым у вас. Рэальнай дэмакратыі, рэальных правоў чалавека… Пра якія правы чалавека вы можаце разважаць, калі вы забіваеце людзей? Забілі чалавека — якія ў яго правы? Ён мёртвы».
Музыка Цім Суладзэ: Розніца 30 гадоў — тое, што адпавядае маім уяўленням пра адносіны41
Каментары