Таццяна Хацкова працуе старшынёй Гомельскай абласной арганізацыі Беларускага прафсаюза банкаўскіх і фінансавых работнікаў. На яе старонцы ў сацыяльнай сетцы была адна-адзіная спасылка на «экстрэмісцкую» інтэрнэт-групу. У судзе жанчына казала, што губляла тэлефон, і гэтую спасылку ад яе імя размясціў хтосьці іншы. Але гэта ёй не дапамагло, паведамляе «Гомельская вясна».
Справа разглядалася ў судзе Цэнтральнага раёна горада Гомеля 4 снежня. Хацкова патлумачыла, што яна гэтай спасылкі не размяшчала, аднак сёлета нібыта губляла свой мабільны тэлефон, а таму мяркуе, што спасылка магла быць размешчана іншай асобай. Адносна страты тэлефона грамадзянка нікуды не звярталася, а праз нейкі час тэлефон быў вернуты ёй невядомай асобай.
Неўзабаве прафсаюзную дзяячку затрымала міліцыя і склала пратакол па частцы 2 артыкула 19.11 КаАП («Распаўсюджванне, вырабленне, захоўванне, перавозка інфармацыйнай прадукцыі, якая ўтрымлівае заклікі да экстрэмісцкай дзейнасці альбо прапагандуе такую дзейнасць»).
Суддзя Сяргей Кармановіч палічыў, што «якіх-небудзь дакладных звестак, якія пацвярджаюць выбыццё з валодання Хацковай яе мабільнага тэлефона», няма, і падвергнуў яе арышту на 15 сутак.
Каментары