Упершыню частка беларускіх праваслаўных будзе адзначаць Каляды 25 снежня па новым стылі
Гэта тычыцца беларускага праваслаўнага прыхода ў Вільні, які знаходзіцца ў юрысдыкцыі Канстанцінопальскага (Сусветнага) патрыярхата.
Гэты прыход быў заснаваны святарамі Георгіем Роем і Аляксандрам Кухтам, якія выйшлі з юрысдыкцыі Маскоўскага патрыярхата. У красавіку гэтага года прыход прыняў канстанцінопальскі патрыярх Варфаламей у сваю юрысдыкцыю.
Абсалютная большасць праваслаўных цэркваў Еўропы (Грэцкая, Балгарская, Канстанцінопальская, Румынская, Крыцкая, Чэшская, Кіпрская) жывуць ужо амаль стагоддзе па новаюліянскім календары, які зараз супадае з грыгарыянскім, па якім жыве ўвесь хрысціянскі свет і свецкія краіны.
Таму ўпершыню беларуская праваслаўная грамада будзе святкаваць Каляды (нараджэнне Хрыста) 25 снежня.
Святкаванне пачнецца вячэрняй літургіяй 24-га снежня а 21-й гадзіне ў віленскай Рэфармацкай царкве (Pylimo g.18).
Ранкам 25-га снежня а 10-й гадзіне святочная літургія будзе служыцца ў Беларускай царкве па вуліцы Boksto g.4, што знаходзіцца каля карчмы «1863».
«Каму будзе цяжка наведаць вячэрнюю літургію, запрашаем ушанаваць Раство Хрыстова раніцою!», — паведамляе Беларускі праваслаўны прыход у сваім тэлеграм-канале.
А 25 снежня а 11-й гадзіне пройдзе дзіцячае каляднае набажэнства ў Мікольскай царкве на Лукішках.
***
Варта зазначыць, што беларуская паваенная эміграцыя, якая не хацела быць у юрысдыкцыі Рускай зарубежнай праваслаўнай царквы на Захадзе, заснавала прыходы Беларускай аўтакефальнай праваслаўнай царквы і беларускія праваслаўныя прыходы ў юрысдыкцыі канстанцінопальскага патрыярхата (у ЗША, Брытаніі, Канадзе, Аўстраліі).
Але ўсе гэтыя прыходы жывуць паводле юліянскага календара, г.зн. святкуюць Каляды 7 студзеня. Тады як Амерыканская праваслаўная царква ў 1970 годзе перайшла на новаюліянскі каляндар.
Цяпер чытаюць
«Астравок Паўночнай Карэі». Баранавіцкая школа выкаціла спіс патрабаванняў да выгляду вучняў30
«Астравок Паўночнай Карэі». Баранавіцкая школа выкаціла спіс патрабаванняў да выгляду вучняў
Містычнае кола Вільні: Каліноўскі быў пахаваны з медальёнам святыні, каля якой вырас гатычны палац доктара з-пад Оршы. Цяпер парэшткі Каліноўскага перапахавалі ў магільні таго ж доктара1515
Каментары
Пераходзьце на сучасны календар!