Селядзец з ігрушамі, журавінамі, яблыкамі і сельдэрэем — альтэрнатыва «шубе». Рэцэпт

Селядзец з грушай і журавінамі

Спатрэбіцца:

• 1 кг селядца а-ля маціяс,
• паўшклянкі воцату,
• дзве грушы,
• каля 50 г сушаных журавін,
• 2 невялікія чырвоныя цыбуліны,
• лаўровы ліст,
• рапсавы алей.

1. Селядзец вымыйце і замачыце ў місцы з вадой на гадзіну. Затым зліце ваду і яшчэ раз заліце селядзец, гэтым разам дадаўшы паўшклянкі воцату. Вытрымайце яшчэ дзве гадзіны.
2. Зліце з селядца ваду і нарэжце яго палоскамі шырынёй прыкладна 2-3 см.
3. Перакладзіце рыбу ў ёмістасць, дзе яна будзе гатавацца. Потым парэжце цыбулю невялікімі кубікамі і дадайце да селядца.
4. Грушы нарэжце кубікамі прыкладна 1 см і таксама дадайце.
5. Пасыпце ўсё журавінамі, дадайце лаўровы ліст і заліце рыбу алеем.

Селядзец з запечанай гароднінай і яблыкамі

Спатрэбіцца:

• каля 200 г морквы
• каля 150 г цыбулі
• 2 яблыкі (лепш салодкія)
• 240 г селядца
• соль
• перац
• алей для гатавання
• кроп (па жаданні)

Як гатаваць:

1. Натрыце моркву на сярэдняй тарцы, цыбулю нарэжце кубікамі.
2. Два яблыкі аблупіце, выдаліце семечкі (лепш за ўсё гэта рабіць адмысловай прыладай). Потым нарэжце яблыкі тонкімі круглымі лустачкамі з дзірачкамі ў сярэдзіне (як на яблычныя чыпсы). Можна нарэзаць і па-іншаму, але так будзе больш прыгожа.
3. На разагрэтую патэльню наліце алей, змажце ім усю паверхню і дадайце лустачкі яблыкаў. Запякайце 2-3 хвіліны адзін бок, затым перавярніце і гатуйце 2-3 хвіліны з іншага боку. Выкладзіце печаныя яблыкі на талерку і дайце ім астыць.
4. На патэльню наліце алей, дадайце нарэзаныя цыбулю і моркву, соль і перац. Увесь час памешваючы, смажце каля 10 хвілін на сярэднім агні.
5. Калі гародніна добра прасмажыцца, выключайце агонь. Трымаючы патэльню ў руцэ, злёгку нахіліце яе ўбок, каб адзін бок патэльні апынуўся ніжэй, а іншы вышэй. Перасуньце гародніну ў верхні бок і прыцісніце, каб сцёк лішні алей (так тлушчу будзе менш).
6. Акуратна лыжкай выкладзіце гародніну на талерку, куды будзеце класці селядзец. Выкладзіце гародніну роўным пластом і дайце ёй астыць.
7. Селядзец парэжце на невялікія кавалачкі і пакладзіце над астылымі цыбуляй і морквай.
8. На селядзец выкладзіце запечаныя яблычныя лустачкі. Страва амаль гатовая!
9. Можаце таксама дадаць жменю кропу — так будзе больш смачна і духмяна, але можна абысціся і без кропу або замяніць яго іншай зелянінай на ваш выбар.

Селядзец з сельдэрэем, яблыкамі і гарчыцай

На 6 порцый:

• 250 г філе селядца
• палова кораня сельдэрэю (каля 250 г)
• 1 салодкія фіялетавыя цыбулі
• 1 яблык (пажадана кіслы)
• 2 сталовыя лыжкі маянэзу
• 0,5 сталовая лыжка смятаны
• 0,5 сталовая лыжка зярністай гарчыцы
• 0,5 чайная лыжка маярану
• 0,5 чайная лыжка молатага чорнага перцу

  Як гатаваць:

1. Селядзец нарэжце кавалачкамі патрэбнага памеру і пакладзіце ў салатніцу разам з дробна нарэзанай цыбуляй.
2. У невялікай ёмістасці змяшайце маянэз, смятану, гарчыцу і спецыі.
3. Корань сельдэрэю ачысціце і натрыце на буйнай тарцы, выкладзіце на селядзец.
4. Яблыкі натрыце на той жа тарцы, адразу выкладайце на сельдэрэй, заліце запраўкай і старанна змяшайце.
5. Перад тым, як падаваць, страву лепш патрымаць у халадзільніку мінімум гадзіну, яшчэ лепш — ноч. Падавайце з любімым хлебам.

Аліўе, крабавая салата і селядзец пад шубай… ​Што самае шкоднае за навагоднім сталом і як з ім змагацца?

Ведаеце, навошта скрыня пад духоўкай? Вось тры сакрэты духовак, якія дапамогуць рыхтаваць навагодняе застолле

Мэр украінскага Дняпра стаміўся трэці дзень есці аліўе ды «шубу» і прапанаваў ад іх адмовіцца

З серыі «Наша страва»: Селядзец па‑беларуску 

• 2
• 0
• 1
• 0
• 1
• 0
• 0
• 0