Жлобінскага чыноўніка адправілі на суткі за выпадковы лайк у інстаграме, але гэта ўжо нікога не цікавіць
Начальніка (праўда, цяпер ужо былога) аддзела спорту і турызму Жлобінскага райвыканкама Яўгена Ахрэменку асудзілі на 15 сутак 28 снежня. Высветліліся падрабязнасці яго затрымання.
Яўгена Ахрэменку арыштавалі за «лайк», які ён паставіў на адной з інстаграм-старонак, прызнаных экстрэмісцкімі, піша «Гомельская вясна».
Ахрэменка адзначыў упадабайкай публікацыю «Free_Zhlobin») уключанай у рэспубліканскі спіс экстрэмісцкіх матэрыялаў і «тым самым павялічыў ахоп аўдыторыі для яе прагляду, чым распаўсюдзіў інфармацыйную прадукцыю названай супольнасці».
У допісе аўтары віншавалі з «днём прафнепрыдатнасці» супрацоўнікаў КДБ.
Сам Ахрэменка падчас судовага працэсу віну прызнаў часткова і патлумачыў, што гэта было зробленае выпадкова, мэты распаўсюджвання не меў, паколькі перачытваў публікацыі названай супольнасці з мэтай выяўлення і спынення супрацьпраўных дзеянняў з боку падначаленых супрацоўнікаў і спартсменаў.
Але на вынік суда пакаянне чыноўніка не паўплывала, роўна як і тое, што Ахрэменка мае трох непаўналетніх дзяцей: 15 сутак і канфіскацыя «прадмета злачынства» — мабільнага тэлефона.
Варта адзначыць, што ў інстаграм-акаўнце самога Ахрэменкі кантэнт выключна «ідэалагічна правільны»: граматы ад іншых чыноўнікаў, афіцыйныя мерапрыемствы, спорт.
Так што, не выключана, што Ахрэменка сапраўды не хлусіў у судзе, але, як можна ўбачыць — гэта нікога не цікавіць і аналагічныя паводзіны нікога не выратуюць.
Цяпер чытаюць
Беларускага Сінюю Бараду адпусцілі з расійскай турмы паміраць дома2
Беларускага Сінюю Бараду адпусцілі з расійскай турмы паміраць дома
«Я стаў шчаслівы». Праца на будоўлі прыносіць добрыя грошы, а грамадская актыўнасць — маральную сілу. Былы каліновец Кусь расказаў пра тое, як вярнуў унутраную раўнавагу1313
Каментары