Польшча не выпускае ў Беларусь транзітныя аўтамабілі з аб’ёмам рухавіка, большым за 1,9 літра
Польшча перастала выпускаць у Беларусь транзітныя аўтамабілі з аб’ёмам рухавіка, большым за 1,9 літра. Паведамленне пра гэта са спасылкай на кіраўніка польскай мытні і фотаздымак адпаведнай абвесткі на мяжы з’явіліся ў тэлеграм-чаце «Граница Польша», заўважыў «Белсат».
Абмежаванне закранае аўтамабілі BMW і канцэрну VAG, які выпускае маркі Volkswagen, Audi, Seat, Škoda ды іншыя. Уласнікі аўтамабіляў пералічаных марак мусяць падаць на мытні дакумент ад вытворцы, які пацвярджае права на экспарт машыны па-за межы Еўрасаюза.
У гэтым дакуменце мае быць пазначана, што вытворца ведае, хто прадае і хто купляе аўтамабіль, а ўгода не выклікае перасцярог датычна магчымага абыходу міжнародных санкцыяў. Акрамя таго, вытворца мусіць пацвердзіць, што ведае канчатковага ўласніка аўтамабіля і ўпэўнены, што машына будзе перамяшчацца транзітам праз тэрыторыю Беларусі ці Расіі ў трэцюю дзяржаву і падчас транзіту не будзе перапрададзеная.
Акрамя таго, уласнік аўтамабіля мусіць падпісаць заяву, што ведае пра адказнасць за фальшаванне такога дакумента.
У канцы абвесткі пра новае абмежаванне даецца спасылка на санкцыйную пастанову Рады Еўрасаюза № 833/2014.
Каментары